خرم شہزاد خرم

بھارت میں " بعض " کھلاڑی کنٹر ول میں نہیں تھے،ڈسپلن توڑنے والوں کو آئندہ قو می ٹیم میں جگہ نہیں ملے گی،نسیم اشر ف



کراچی (عبدالماجد بھٹی/ اسٹاف رپورٹر) پاکستان کرکٹ بورڈ کے سربراہ ڈاکٹر نسیم اشرف نے کہا کہ ڈومیسٹک کرکٹ نہ کھیلنے والے کھلاڑیوں پر جرمانہ عائد کیا جائے گا۔ ایسے کھلاڑیوں کو سینٹرل کنٹریکٹ دینے پر نظر ثانی کی جائے گی، جو قومی سیزن کو نظر انداز کر کے دیگر سرگرمیوں میں ملوث ہیں۔ اگر کوئی کھلاڑی بولی وڈ میں قسمت آزمانا چاہتا ہے تو شوق سے جائے۔ ڈسپلن کی خلاف ورزی بہت ہو چکی ہے۔ اب کسی کو معافی نہیں ملے گی۔ ڈسپلن توڑنے والا کھلاڑی کتنا ہی با اثر کیوں نہ ہو، اسے پاکستان ٹیم میں جگہ نہیں ملے گی، وہ اتوار کو اسلام آباد سے نمائندہ جنگ کو انٹرویو دے رہے تھے۔ انہوں نے کہا کہ ڈومیسٹک سیزن کی بے حد اہمیت ہے۔ پی سی بی تمام کھلاڑیوں کی کارکردگی کو مانیٹر کر رہا ہے کہ کون سیزن کھیل رہا ہے اور کون آرام کر رہا ہے۔ انہوں نے فاسٹ بولر شعیب اختر کا نام لئے بغیر کہا کہ بھارت میں آف دی فیلڈ بعض کھلاڑیوں کی حرکتیں ملک اور ٹیم کی بدنامی کا سبب بنی ہیں۔ ہم نے سیریز سے قبل کہہ دیا تھا کہ بھارت میں میڈیا ایڈوانس ہے، اس لئے کھلاڑی غیر ضروری سرگرمیوں سے اجتناب برتیں لیکن کچھ کھلاڑی کنٹرول سے باہر رہے۔ ہر کھلاڑی کی ذاتی زندگی ہے، ہم اس میں مداخلت نہیں کریں گے لیکن اگر کسی کو میڈیا اور بولی وڈ میں قسمت آزمائی کے لئے کرکٹ کھیلنا ہے تو ہم اسے برداشت نہیں کریں گے۔ ہم نے تمام واقعات کا نوٹس لے لیا ہے۔ 15 جنوری کو گورننگ بورڈ میں منیجر اور کوچ کی رپورٹ بے حد اہم ہو گی، تاہم ہم نے طے کر لیا ہے کہ ڈسپلن کی خلاف ورزی برداشت نہیں کی جائے گی۔ بڑے سے بڑا کھلاڑٰ ڈسلپن کی خلاف ورزی کرتا ہے تو اسے قومی ٹیم میں جگہ نہیں ملے گی۔ انہوں نے کہا کہ بھارت میں سیریز کے کچھ مثبت پہلو بھی تھے لیکن بعض واقعات کی وجہ سے جگ ہنسائی ہوئی۔عبدالرؤف اور راؤ افتخار انجم کے سلیکشن کے تنازع کے تناظر میں انہوں نے کہا کہ ماضی میں سلیکٹرز 15 کھلاڑیوں کے نام بورڈ کو دے دیتے تھے اب ہم نے سلیکشن پالیسی تبدیل کر دی ہے۔ قومی سلیکشن کمیٹی کپتان اور کوچ کی مشاورت سے 15 کھلاڑیوں کے ساتھ ریزرو کھلاڑیوں کا بھی اعلان کرے گی۔ دورے میں اگر کوئی کھلاڑی ان فٹ ہوتا ہے تو ٹیم انتظامیہ کسی کھلاڑی کا نام لئے بغیر کہے گی کہ ہمیں فاسٹ بولر یا بیٹسمین درکار ہے۔ سلیکٹرز ریزرو کھلاڑیوں ہی سے متبادل کھلاڑی کا انتخاب کریں گے۔ ریزرو کے علاوہ باہر سے کسی کھلاڑی کو ٹیم میں شامل نہیں کیا جائے گا۔ سلیکٹرز اور ٹیم انتظامیہ میں کمیونی کیشن بڑھانے کا فیصلہ کیا گیا ہے۔ 15 جنوری کو کراچی میں گورننگ بورڈ اجلاس میں سلیکٹرز کے ساتھ ساتھ منیجر اور کوچ دورے کی رپورٹ دیں گے۔ اس رپورٹ میں منیجر اور کوچ تفصلیی رپورٹ میں بتائیں گے کہ ٹیم سیریز کیوں ہاری۔ ڈاکٹر نسیم اشرف نے کہا کہ ہم نے اسٹار کھلاڑیوں کو سینٹرل کنٹریکٹ دیتے وقت ان کے لیے لازمی قرار دیا تھا کہ وہ ڈومیسٹک کرکٹ کھیلیں۔ بھارت کے دورے کے بعد مختلف کھلاڑیوں کی مختلف سرگرمیاں ہیں۔ ڈومیسٹک کرکٹ کو نظرانداز کرنے والے کھلاڑیوں پر جرمانہ عائد کیا جائے گا اور ایسے کھلاڑیوں کو مستقبل میں سینٹرل کنٹریکٹ دینے سے قبل نظرثانی کی جائے گی۔ انہوں نے کہا کہ بھارت کے دورے میں مصباح الحق نے بیٹنگ کے شعبے میں نمایاں کارکردگی دکھائی۔ یونس خان، سلمان بٹ اور کامران اکمل کی بیٹنگ بہت اچھی رہی۔ یاسر عرفات نے متاثرکن ڈیبیو کیا۔ یاسرعرفات کو سہیل تنویر کے ساتھ مستقبل کا آل راؤنڈر قرار دیا جاسکتا ہے۔ پاکستان ٹیم کی فائٹنگ کوالٹی بھی قابل داد رہی۔ انہوں نے کہا کہ منیجر اور کوچ تفصیلی رپورٹ میں شکست کے اسباب اور تجاویز دیں گے۔ اس کی روشنی میں فیصلے کئے جائیں گے۔