خرم شہزاد خرم

بہت عرصے بعد سنچری اسکور کرنے سے سکون ملا ہے، سچن ٹنڈولکر



سڈنی (جنگ نیوز) 2007 میں نصف درجن سے زائد مرتبہ نروس نائنٹیزکا شکار ہونے والے سچن ٹنڈولکرکے لیے نیا سال لکی ثابت ہوا۔ انہوں نے نوے کے پھیرے سے نجات پاتے ہوئے سنچری اسکورکرڈالی۔ ان کا کہنا ہے کہ میں نے نائنٹیز میں پہنچنے کے بعد اسکور بورڈ کی جانب دیکھنا چھوڑ دیا تھا،کیونکہ میں اس بار تھری فیگرز اننگ سے محروم ہونا نہیں چاہتا تھا، انہوں نے154 رنزکی اننگ کو خاص قرار دیا۔ یہ ان کے کیریئرکی38 ویں، آسٹریلیا کے خلاف آٹھویں اور سڈنی کرکٹ گراؤنڈ پرکھیلے جانے والے چار میچوں میں تیسری سنچری ہے۔کھیل کے بعد میڈیا سے بات چیت کرتے ہوئے انہوں نے کہا کہ 38 ویں ٹیسٹ سنچری بنانے کے بعد ان کو بہت اطمینان حاصل ہوا ہے۔ ٹنڈولکر اپنی سنچری کے قریب پہنچنے کے وقت اسکور بورڈ کی جانب متوجہ نہیں تھے، تاہم ان کا کہنا ہے کہ انہوں نے ہر بھجن سنگھ سے دو رنز لینے کیلئے تیز دوڑنے کا کہا جس سے ان کی سنچری مکمل ہوگئی۔ ٹنڈولکر بالخصوص اس بات پر خوش تھے کہ ان کی بیٹنگ سے بھارت کی پوزیشن اچھی ہوگئی اور آسٹریلیا کے خلاف69 رنزکی برتری حاصل ہوگئی۔ لٹل ماسٹر نے کہا کہ انہوں نے گیند کے معیار کے مطابق کھیلنے اور خراب گیندوں کا انتظار کرنے کی کوشش کی، ایکاور سوال کے جواب میں ٹنڈولکر نے کہا کہ ڈان بریڈ مین عظیم بیٹسمین تھے، وہ نہیں سمجھتے کہ کوئی بھی کرکٹر ان کا مقابلہ کر سکتا ہے۔ سچن نے ہربھجن کے ساتھ آٹھویں وکٹ کی شراکت میں129رنزکا اضافہ کیا جس سے بھارتی ٹیم ایک مشکل صورتحال سے بچ گئی۔34 سالہ اسٹار بیٹسمین نے کہا کہ وہ جانتے تھے کہ ہربھجن رنز حاصل کر سکتا ہے اور آج اس نے یہ بات ثابت کردی، اگر ایک نچلے درجے پرکھیلنے والے بیٹسمین کو اعتماد دیا جائے تو وہ خود کو ثابت کرتا ہے۔