خرم شہزاد خرم

کراچی (اسٹاف رپورٹر) پاکستان کرکٹ بورڈ نے سینٹرل کنٹریکٹ پر معاہدے کے لئے اسٹار کرکٹر یونس خان ، محمد یوسف اور عبدالرزاق کو مزید مہلت دیدی ہے پاکستان کرکٹ بورڈ کے چیف آپریٹنگ آفیسر شفقت نغمی نے لاہور سے ٹیلی فون پر جنگ کو بتایا کہ یونس خان نے بورڈ سے رابطہ کرکے اس مہلت میں اضافے کی درخواست کی تھی جبکہ محمد یوسف نے کوئی اطلاع نہیں دی تاہم وہ کسی تبلیغی دورے پر ہیں اس لئے ان سے رابطہ نہیں ہوپارہا ہے تاہم اگر وہ معاہدے پر دستخط کرنا چاہتے ہیں تو انہیں مزید مہلت دی جاسکتی ہے۔ عبدالرزاق نے اس حوالے سے کچھ نہیں کہا ان کے تنقیدی بیانات آرہے ہیں اور بورڈ اس کا جائزہ لے رہا ہے انہوں نے مزید کہا کہ جن کھلاڑیوں کو معاہدے کا مسودہ بھیج دیا گیا ہے اب گیند ان کے کورٹ میں ہے وہ اپنے بارے میں فیصلہ کرنے کے بارے میں خودمختار ہیں۔ ایک سوال پر شفقت نغمی نے کہا کہ انڈین لیگ کھیلنے کے لئے ہر کھلاڑی آزاد ہے تاہم پاکستان کرکٹ بورڈ ان پر زندگی بھر کے لئے کرکٹ کے دروازے بند کردے گا عمران فرحت نے اپنا سینٹرل کنٹریکٹ واپس کردیا ہے اور بورڈ سے ریلیز کرنے کی درخواست کی ہے ۔ بورڈ کا کہنا ہے کہ ہم عمران فرحت کے الزامات کا بغور جائزہ لیں گے اگر ان کی شکایت جائز ہوئی تو اسے دور کرنے کی کوشش کریں گے دریں اثناء پاکستان کرکٹ ٹیم کے اوپنر عمران فرحت نے کہا ہے کہ پانچ چھ ماہ سے سلیکٹرز میرے ساتھ نا انصافی کررہے ہیں اس پر میں نے احتجاج بھی کیا مگر کرکٹ بورڈ نے اسے اہمیت نہیں دی 27/ ٹیسٹ اور 33/ ون ڈے انٹرنیشنل میچوں میں ملک کی نمائندگی کرنے والے اوپنر نے کہا کہ میں نے انڈین کرکٹ لیگ کھیلنے کا فیصلہ کرلیا ہے میں آف کرکٹ کھیلنے کیلئے یہ معاہدہ کررہا ہوں مجھے پیسے کی لالچ نہیں پاکستان کرکٹ بورڈ دانستہ بعض کھلاڑیوں کیساتھ نا انصافی کررہاہے اور انہیں ملک کے بجائے کاؤنٹی اور انڈین لیگ کھیلنے کی جانب دھکیل رہاہے اس رویہ کا سرکاری سطح پر نوٹس لیا جانا چاہئے۔

__________________