خرم شہزاد خرم

لاہور (جنگ نیوز) پاکستان کرکٹ بورڈ کے چیئرمین ڈاکٹر نسیم اشرف نے کہا ہے قومی کرکٹ ٹیم میں زیادہ تر نوجوان کھلاڑی ہیں اور نوجوان کھلاڑیوں پر مشتمل ٹیم نے ابھی سے اچھے نتائج دینا شروع کردئیے ہیں۔ پاکستان میں کرکٹ کا مستقل تابناک ہے۔انہوں نے کہا کہ ان کی پہلی ترجیح پاکستان کرکٹ بورڈ کا آئین نافذ کرنا تھا اور انھیں خوشی ہے کہ یہ کام خوش اسلوبی سے سرانجام پایا ہے۔ میڈیا سے بات چیت کرتے ہوئے ڈاکٹر نسیم اشرف نے کہا کہ نئے آئین کے نفاذ کے بعد موجودہ دور کو پاکستان کرکٹ بورڈ کا نیا دور کہاجاسکتا ہے ۔ انہوں نے بتایا کہ ڈائریکٹر کرکٹ آپریشن ‘ چیف آپریٹنگ آفیسر اور سلیکشن کمیٹی کا تقرر دوسال کیلئے ہے۔ ڈاکٹر نسیم اشرف نے کہاکہ اب ان کی خواہش ہے کہ کرکٹ کا کھیل گراس روٹ لیول پرفروغ پائے اور اس کیلئے گراونڈ ‘ کوچز اورکھلاڑیوں کی معاونت کی ضرورت ہے ۔ انہوں نے کہاکہ فٹنس ‘ ڈسپلن اورکلچر پرسمجھوتہ کرنے کا نقصان ہوتا ہے ۔ ایک سوال کے جواب میں انہوں نے کہاکہ ڈسپلن پرکسی قسم کا سمجھوتہ نہیں کیاجاسکتا اور پاکستان کرکٹ بورڈ نے ڈسپلن کی خلاف ورزی کرنے پر سینئر کھلاڑیوں کو سزا دے کرثابت کردیا ہے کہ اس بارے میں کسی کے ساتھ رعایت نہیں برتی جائے گی۔

__________________