تفسیر حیدر

پاکستان اور نیوزی لینڈ کے درمیان آئی سی سی چیمپئنز ٹرافی سے قبل تین ون ڈے انٹرنیشنل میچوں کی سیریز کا حتمی فیصلہ آئندہ ہفتے نیوزی لینڈ کرکٹ بورڈ کے اجلاس میں ہوگا۔ نیوزی لینڈ نے ٹورنامنٹ کی تیاریوں کے سلسلے میں فیصل آباد میں دو اور ملتان میں ایک ون ڈے انٹرنیشنل میچ کھیلنا تھا۔ ملک کی کشیدہ سیکورٹی صورتحال کے باعث ان میچوں کا انعقاد بھی مشکل دکھائی دے رہا ہے۔ پاکستان کرکٹ بورڈ کے چیف آپریٹنگ آفیسر شفقت نغمی نے جمعرات کو لاہور سے ٹیلیفون پر نمائندہ جنگ کو بتایا کہ یہ ون ڈے سیریز نیوزی لینڈ کرکٹ کی درخواست پر ہو رہی تھی۔ آج ہم نے نیوزی لینڈ کے حکام سے رابطہ کر کے پوچھا ہے کہ وہ ون ڈے سیریز کے لئے پاکستان آنا چاہتے ہیں یا نہیں۔ نیوزی لینڈ بورڈ نے ہم سے چند دن کی مہلت مانگی ہے۔ آئندہ ہفتے نیوزی لینڈ کرکٹ بورڈ کی میٹنگ ہو رہی ہے جس میں دورہ پاکستان کے حوالے سے فیصلہ کیا جائے گا۔ شفقت نغمی نے کہاکہ آئی سی سی چیمپئنز ٹرافی پروگرام کے تحت پاکستان میں ہونی ہے۔ آئی سی سی کی ٹاسک ٹیم14 اگست کے فوراً بعد پاکستان آئے گی۔ وہ پاکستان کے حالات کا جائزہ لے گی۔ موجودہ صورتحال میں ٹورنامنٹ پاکستان ہی میں ہوگا اگر آئی سی سی چیمپئنز ٹرافی پاکستان میں ہوتی ہے تو نیوزی لینڈ ٹیم کو بھی اس میں شرکت کرنا ہے اس لئے کوئی وجہ نہیں ہے کہ کیوی ٹیم پاکستان نہ آئے۔ انہوں نے کہاکہ پی سی بی کو ون ڈے سیریز کی تیاریاں کرنی ہیں خاص طور پر اسپانسر شپ کے لئے معاہدہ کرنا ہے اس لئے ہم چاہتے ہیں کہ نیوزی لینڈ بورڈ جلد سے جلد پاکستان کے دورے کی تصدیق کر دے۔ پاکستان اور نیوزی لینڈ کے درمیان24 اور 27 اگست کو ون ڈے میچ فیصل آباد کے اقبال اسٹیڈیم میں ہوں گے جب کہ 30 اگست کو آخری ون ڈے ملتان اسٹیڈیم میں کھیلا جائے گا۔ پی سی بی کے ڈائریکٹر آپریشنز ذاکر خان نے جنگ کو بتایا کہ ون ڈے سیریز کے حوالے سے بات چیت جاری ہے۔ ہم پرامید ہیں کہ اس بارے میں بہتر فیصلہ ہوگا۔ آئی سی سی چیمپئنز ٹرافی کے میچ لاہور، کراچی اور پنڈی میں ہونا ہیں اس لئے نیوزی لینڈ کے میچوں کی میزبانی فیصل آباد اور ملتان کو دی گئی ہے۔ دریں اثناء نیوزی لینڈ کے سابق کپتان اسٹیفن فلیمنگ نے کہا ہے کہ آئی سی سی چیمپئنز ٹرافی میں شرکت کے حوالے سے فیصلہ کھلاڑیوں کے بجائے نیوزی لینڈ کرکٹ بورڈ کو کرنا چاہئے۔ نیوزی لینڈ سمیت کئی ملکوں نے پاکستان کے حالات پر تحفظات ظاہر کرتے ہوئے ٹورنامنٹ میں شرکت نہ کرنے کی دھمکی دی ہے۔ ٹورنامنٹ سے قبل نیوزی لینڈ کو پاکستان میں تین ون ڈے انٹرنیشنل میچوں کی سیریز میں حصہ لینا ہے۔ اسٹیفن فلیمنگ نے کہا کہ میں کرکٹ سے کنارہ کش ہو چکا ہوں ورنہ سیکورٹی کے حوالے سے پاکستان سے جو خبریں آ رہی ہیں اس پر کسی کو بھی تشویش ہو سکتی تھی تاہم آئی سی سی چیمپئنز ٹرافی میں شرکت کے حوالے سے فیصلہ کھلاڑیوں کو انفرادی طور پر نہیں کرنا چاہئے۔ بورڈ جو فیصلہ کرے اسے کھلاڑیوں کو قبول کرنا چاہئے۔ انہوں نے کہاکہ اگر تین یا چار ملک اپنی کمزور ٹیموں کو پاکستان بھیجتے ہیں تو اس سے ٹورنامنٹ کی افادیت کم ہو سکتی ہے اس لئے آئی سی سی کو آگے آ کر کردار ادا کرنا چاہئے۔ نیوزی لینڈ کرکٹ خوش قسمت ہے کہ اس حساس معاملے پر اسے دیگر ملکوں کی بھی حمایت حاصل ہے۔ آئی سی سی میں نیوزی لینڈ کا اپنا مقام ہے۔ کیوی کرکٹرز اس سے قبل2003ء میں کینیا میں بھی کھیلنے سے انکار کر چکے ہیں۔ اس بار ہمیں آسٹریلیا اور انگلینڈ جیسے بڑے ٹیسٹ کھیلنے والے ملکوں کی حمایت حاصل ہے۔