محمدعدنان

بھارتی کرکٹ کنٹرول بورڈ نے کھلاڑیوں کی حمایت کرتے ہوئے اینٹی ڈوپنگ کی عالمی ایجنسی ( واڈا) کے اصولوں کو مسترد کر دیا ہے۔

بی سی سی آئی کے مطابق وہ ڈوپ ٹیسٹ کے خلاف نہیں ہے لیکن وہ ٹیسٹ کی حکمت عملی کی حمایت نہیں کرتا ہے۔

بی سی سی آئی کے صدر ششانک منوہر جوشی نے ممبئی میں بی سی سی آئی کی ایک میٹنگ کے بعد صحافیوں سے بات چیت میں کہا ’ ہم کھیل کے دوران کسی بھی کھلاڑی کے ڈوپ ٹیسٹ کرائے جانے کی حمایت کرتے ہیں لیکن جب ہمارے کھلاڑی کرکٹ نہیں کھیل رہیں ہوں تو اس وقت ہم ان کی نجی زندگی میں دخل اندازی نہیں کرنا چاہتے‘۔

ششناک منوہر نے کہا کہ بھارت میں کچھ کھلاڑیوں کو سکیورٹی فراہم کی گئی ہے اس لیے سکیورٹی کے سبب ان کی موجودگی کی معلومات حاصل کرنا ممکن نہيں ہوگا۔

واڈا چاہتا ہے کہ کھلاڑی اس بات کی تفصیلات فراہم کریں کہ وہ پورے دن کہاں ہیں تاکہ ضرورت پڑنے پر ان سے رابطہ قائم کیا جا سکے اور جن دواؤں پر باپندی عائد ہے ان کے لیے ٹیسٹ کیا جا سکے۔

واڈا کا کہنا ہے کہ کھلاڑیوں کے دن بھر کے پروگرام کے بارے میں ان کے پاس کوئی معلومات نہيں ہوتیں۔ دوسری جانب کھلاڑیوں کا کہنا ہے کہ ان پر بنا کسی بات کے پابندی عائد کی جا رہی ہے۔

بی سی سی آئی کی میٹنگ میں مہندر سنگھ دھونی، یوراج سنگھ اور ہربھجن سنگھ بھی موجود تھے اور بی سی سی آئی کے مطابق کھلاڑیوں نے بھی واڈا کے اصولوں پر اعتراضات ظاہر کیے ہیں۔