محمدعدنان

فاسٹ بولر محمد آصف فٹ ہوکر پاکستانی کرکٹ ٹیم میں دوبارہ جگہ بنانے میں کامیاب ہوگئے ہیں۔
پیر کو سلیکٹرز نے بنگلہ دیش کے خلاف ملتان کے چوتھے ون ڈ ے انٹرنیشنل کے لیے جس سولہ رکنی ٹیم کا اعلان کیا ہے اس میں محمد آصف کا نام بھی شامل ہے۔

واضح رہے کہ محمد آصف کُہنی کی تکلیف کے سبب گزشتہ سال جنوبی افریقہ کے خلاف ملتان کے ون ڈے کے بعد سے ٹیم سے باہر ہیں اور علاج معالجے اور بحالی کے عمل سے گزرنے کے بعد گزشتہ دنوں وہ ایک روزہ قومی کرکٹ ٹورنامنٹ کا میچ کھیلے تھے۔

محمد آصف کو اس وقت پاکستان کے سب سے بہترین فاسٹ بولر کے طور پر پہچانا جاتا ہے۔ لیکن پہلے ڈوپنگ اور پھر فٹنس مسائل کے سبب وہ گزشتہ کچھ عرصے سے کرکٹ کے میدانوں میں مستقل نظر نہیں آسکے ہیں۔

محمد آصف نے گیارہ ٹیسٹ میچوں میں اکیاون وکٹیں حاصل کی ہیں البتہ ون ڈے میں ان کا ریکارڈ زیادہ متاثرکن نہیں ہے۔ انہوں نے انتیس ون ڈے میچوں میں صرف اکتیس وکٹیں حاصل کی ہیں۔

سلیکٹرز نے سولہ اپریل کو ملتان میں ہونے والے ون ڈے انٹرنیشنل کے لیے اعلان کردہ ٹیم میں بیٹسمین نعمان اللہ کو بھی شامل کیا ہے جو اس سیزن میں عمدہ کارکردگی کا مظاہرہ کررہے ہیں۔ اوپنر ناصر جمشید کو ٹیم سے ڈراپ کردیا گیا ہے۔ اور مڈل آرڈر بیٹسمین یونس خان پہلا میچ کھیلنے کے بعد بقیہ میچز کھیلنے سے پہلے ہی معذرت کرچکے ہیں۔

پاکستان کی سولہ رکنی ٹیم کے نام یہ ہیں: شعیب ملک( کپتان)، سلمان بٹ، کامران اکمل، محمد یوسف، مصباح الحق، شاہد آفریدی، بازیدخان، فواد عالم، سہیل تنویر، سہیل خان، راؤ افتخار، سرفراز احمد، وہاب ریاض، محمد آصف، نعمان اللہ اور عمرگل۔

پاکستان کو بنگلہ دیش کے خلاف ون ڈے سیریز میں تین صفر کی برتری حاصل ہے۔

__________________