خرم شہزاد خرم

کراچی (عبدالماجد بھٹی/ اسٹاف رپورٹر) گزشتہ آٹھ سال سے پاکستان کرکٹ بورڈ کے معاملات ”ون مین شو“ کے تحت چلنے کے بعد نئے آئین میں زیادہ تر اختیار ”گورننگ بورڈ“ کو سونپے جا رہے ہیں۔ ڈاکٹر نسیم اشرف محدود اختیارات کے باوجود پی سی بی کے سربراہ کی حیثیت سے ذمے داریاں نبھائیں گے۔ پاکستان کرکٹ بورڈ کے نئے آئین کے اجراء کا باضابطہ نوٹیفکیشن اگلے72 گھنٹوں میں جاری ہو رہا ہے۔ پی سی بی کے طاقتور ”گورننگ بورڈ“ میں دو سابق ٹیسٹ کرکٹرزکے علاوہ ٹیکنو کریٹ‘ صوبائی اور ریجن کے نمائندوں کو شامل کیا جائے گا، تاہم گورننگ بورڈ میں نوجوان خون کو شامل کرنے کی پالیسی اپنائی جائے گی۔ واضح رہے کہ پی سی بی کے سرپرست اعلیٰ اور صدر پاکستان جنرل پرویز مشرف نے بورڈ کے نئے آئین کے مسودے کی منظوری دے دی ہے۔ وزارت قانون نئے آئین کے مسودے کی منظوری اگلے تین دن میں دیدے گی جس کے بعد چیئرمین سمیت پی سی بی کے اعلیٰ افسران کی حیثیت برائے نام رہ جائے گی اور تمام فیصلے باہمی مشاورت سے کیے جائیں گے۔ پی سی بی کے چیئرمین ڈاکٹرنسیم اشرف نے اتوار کو اسلام آباد سے نمائندہ جنگ کو خصوصی انٹرویو دیتے ہوئے انکشاف کیا کہ اگلے چند دن میں پی سی بی کے نئے آئین کا نوٹیفکیشن جاری ہوجائے گا۔ اس آئین کو فوری طور پر نافذکردیا جائے گا۔ مصدقہ ذرائع کے مطابق آئین کے تحت پی سی بی کے معاملات کو چلانے کا اختیار گورننگ بورڈ کے پاس ہوگا۔ بورڈ کے اراکین کی تعداد15 سے 20 ہوسکتی ہے۔ اس میں دو سابق ٹیسٹ کرکٹرزکو بھی شامل کیا جائے گا۔ ڈاکٹر نسیم اشرف نے گورننگ باڈی میں سابق کرکٹرز کی تعداد بتانے سے معذرت کی البتہ انہوں نے تصدیق کی کہ گورننگ بورڈ میں ٹیکنوکریٹس‘ صوبائی ایسوسی ایشن اور ریجن کو متوازن نمائندگی دی جائے گی۔گورننگ بورڈ کے اعلان کے بعد چیئرمین کے اختیارات کم کردیئے جائیں گے۔ ایک سوال کے جواب میں انہوں نے کہا کہ پی سی بی کے پہلے چےئرمین جسٹس کارنیلس سے اب تک پی سی بی کے سربراہوں کی تقرری بورڈ کے سرپرست اعلیٰ کرتے ہیں، چونکہ میری تقرری صدر مملکت نے کی ہے اس لیے میں بدستور پی سی بی کا چیئرمین رہوں گا البتہ میرے اختیارات محدود ہوں گے۔ انہوں نے کہا کہ میں نے وعدہ کے مطابق پی سی بی کا نیا آئین منظورکرالیا، اب بورڈ کے معاملات جمہوری انداز میں چلیں گے۔ اب کسی مسئلے پر رسہ کشی دکھائی نہیں دے گی بلکہ تمام معاملات اتفاق رائے سے ہوں گے۔ انہوں نے کہا کہ ایڈہاک کمیٹی ختم ہوجائے گی۔گورننگ بورڈ میں اچھی شہرت کے حامل ماہرین کو جگہ دی جائے گی۔ تجربہ کار لوگ کرکٹ کو سمجھتے ہوں، تاہم گورننگ بورڈ میں نوجوان خون کو متعارف کرایا جائے گا۔ ڈاکٹر نسیم اشرف نے کہا کہ پی سی بی کے کلچرکو تبدیل کرنے کی اشد ضرورت ہے لیکن اصل اہمیت ڈسپلن کی ہوگی۔ ڈسپلن کے معاملے میں کوئی سودے بازی نہیں کی جائے گی۔ میں نے ہیومن ریسورس کے ایک ادارے سے پی سی بی کا سروے کیا۔ اب بورڈ کو کارپوریٹ کلچرکے تحت چلایا جا رہا ہے۔ نئے آئین میں تمام افسران گورننگ بورڈ کو جوابدہ ہوں گے، اب ون مین شوکے تحت کوئی کام نہیں ہوسکے گا۔ انہوں نے کہا کہ بعض لوگ افواہیں اڑا رہے ہیں کہ پی سی بی میں وائس چیئرمین کی تقرری عمل میں لائی جا رہی ہے، یہ تاثر غلط ہے۔

__________________