champion_pakistani

پاکستان کرکٹ بورڈ کے چیئرمین ڈاکٹر نسیم اشرف کا کہنا ہے کہ آئی سی سی کے وفد کا دورہ پاکستان بہت اہمیت کا حامل تھا۔ امید ہے کہ چیمپئینز ٹرافی 11 ستمبر کو پاکستان میں ہوگی۔ گزشتہ روز میڈیا سے بات چیت کرتے ہوئے ڈاکٹر نسیم اشرف نے کہا کہ ویمن کرکٹ کے معاملات کیلئے چیئرپرسن سمیت سات رکنی ایگزیکٹو کمیٹی تشکیل دینے کا فیصلہ کیا گیا ہے۔ انہوں نے کہا کہ پی سی بی نے ڈوپنگ کے حوالے سے زیرو ٹالرنس پالیسی اپنائی ہے۔ کھلاڑیوں کے ڈوپ ٹیسٹ کرنا کوئی انوکھی بات نہیں ہے۔ نسیم اشرف نے کہا کہ محمد آصف کیلئے بنگلہ دیش کیخلاف سیریز اور آئی پی ایل میں کھیلنا بہت ضروری تھا انہیں چھ ماہ گھنگھرو باندھ کر بٹھایا نہیں جا سکتا تھا۔ ان کا ہاتھ زخمی ہوا ہے وہ کہنی کی انجری کا شکار نہیں ہیں۔ انہوں نے مزید کہا کہ محمد یوسف آئی پی ایل میں شرکت نہ کرنے کی وجہ سے افسردہ نہیں ہیں جبکہ یونس خان کو ویسٹرن آسٹریلیا کی جانب سے شیفلڈ شیلڈ کھیلنے کی اجازت دیدی گئی ہے۔ انہوں نے کہا کہ شعیب اختر کیس میں ایپلٹ ٹریبونل میں بیٹھنے کا فیصلہ گورنر پنجاب سلمان تاثیر پر چھوڑا ہوا ہے۔ چیئرمین پی سی بی نے کہا کہ آئی سی سی چیمپئینز ٹرافی شیڈول کے مطابق پاکستان میں ہو گی۔