خرم شہزاد خرم

ڈوپنگ ٹیسٹ:مارٹینا ہنگزپر دو سال کی پابندی عائد کردی گئی



سڈنی (جنگ نیوز) سابق عالمی نمبرون ٹینس اسٹار مارٹینا ہنگز کو ڈوپنگ ٹیسٹ مثبت ثابت ہونے کے جرم میں دو سال کی پابندی عائد کردی گئی ہے ۔27 سالہ سوئٹزر لینڈ کی اسٹار کھلاڑی کا گزشتہ سال ومبلڈن مقابلوں میں کوکین کا مثبت ٹیسٹ سامنے آیا تھا جبکہ انٹرنیشنل ٹینس فیڈریشن نے مارٹینا کی پابندی کے خلاف اپیل کو مسترد کردیا ہے اور دو سالہ پابندی عائد کردی ہے جس کا اطلاق یکم اکتوبر 2007 سے ہوگا لیکن سابق اسٹار کھلاڑی اس سے قبل ہی انٹرنیشنل ٹینس سے ریٹائرمنٹ کا اعلان کرچکی ہیں۔ لیکن آئی ٹی ایف کی پابندی کے اعلان کے بعد مارٹینا ہنگز کے ومبلڈن اور اس کے بعد کے ٹورنامنٹس کے رینکنگ پوائنٹس اور انعامی رقم ضبط کرلی جائے گی۔ پانچ بار کی گرینڈ سلم ونر کے یورین سیمپل سے مثبت ٹیسٹ سامنے آیا تھا جوکہ ٹیسٹ چیمپئن شپ کے تیسرے راؤنڈ میں لارا گران ویل سے شکست کے بعد لیاگیا تھا جبکہ مارٹینا نے قبل ازیں کہا تھا کہ وہ بے قصور ہیں۔ان کا کہنا تھا کہ ان کی بے قصوری بالوں کے ٹیسٹ کے منفی نتیجے سے سامنے آتی ہے جس سے معلوم ہوسکتا ہے کہ کوکین کا ستعمال ہوا ہے یا نہیں ۔آئی ٹی ایف کے بیان میں بتایا گیا ہے کہ دسمبر میں دو روزہ سماعت کے بعد ہنگز کی جانب سے 29 جون 2007 کو فراہم کیاگیاسیمپل کوکین کے استعمال کے سلسلے میں مثبت رہا ہے جبکہ ٹریبونل نے ہنگز کی اس تجویز کو رد کردیاہے کہ ان سے منسلک سیمپل کے بارے میں شکوک و شبہات ہیں کہ آیا یہ ان کاہے یا نہیں۔ ٹریبونل نے ہنگز کی جانب سے غفلت یا غلطی نہ ہونے کے عذر کو بھی رد کردیا ہے کیونکہ ایسی کوئی صورت نظر نہیں آئی کہ اتفاقاً کوکین کا استعمال ہوا ہو۔ ہنگز سال 2006 میں تین سال دنیائے ٹینس سے باہر رہنے کے بعد واپس آئی تھیں جبکہ وہ اپنے کیرےئر میں 43 ڈبیلو ٹی اے سنگلز ٹائٹلز جیتنے کا اعزاز رکھتی ہیں۔