عبدالقدوس

کراچی کے نوجوانوں کو کھیلوں کی سہولتیں فراہم کی جائیں گی،وزیر اعظم

وزیراعظم شوکت عزیز نے کہا ہے کہ کراچی کے عوام کو تفریحی اور کھیلوں کی مزید سہولت فراہم کی جائینگی ۔ انہوں نے کہا کہ موجودہ حکومت نے عوام کے مسائل حل کیے ہیں اور انہیں ہر ممکن سہولتیں دی ہیں یہ بات انہوں نے اتوا ر کی شام نارتھ ناظم آباد کے بلاک Gمیں نارتھ ناظم آباد جیم خانہ کی سنگ بنیاد کی تقریب سے خطاب کرتے ہوئے کہی جس میں ہزاروں افراد نے شرکت کی ۔ تقریب سے خطاب کرتے ہوئے وزیراعظم نے کہا کہ نارتھ ناظم آباد پورے ملک کی عکاسی کرتا ہے یہ تاریخی شہر ہے جہاں سے نامور کھلاڑیوں نے جنم لیا حکومت نے ہمیشہ عوام کو مثبت سرگرمیوں کی فراہمی کیلئے موثر امداد کی ہے اس جیم خانہ کی تعمیر سے بھی متوسط طبقے کے عوام کو تفریح کی شان دار اور جان دار سہولتیں مل جائینگی ۔ انہوں نے کہا کہ موجودہ حکومت نے عوام سے کئے گئے وعدوں کو پورا کیا ہم نے محض زبانی دعوے نہیں کیے بلکہ انہیں عملی شکل بھی دی وزیراعظم نے اس موقع پر جیم خانہ کی تعمیر کیلئے دس کروڑ روپے کی امداد کا بھی اعلان کیا ۔تقریب سے خطاب کرتے ہوئے گورنر سندھ ڈاکٹر عشرت العباد نے کہا کہ مڈل کلاس طبقے کیلئے جیم خانہ کی تعمیر بڑا کارنامہ ہے ۔ انہوں نے کہا کہ کراچی کا کھیلوں اور تفریحی اعتبار سے ماضی میں بڑا اہم کردار رہا ہے ہم مستقبل میں بھی اس شہر میں اس قسم کی بھرپور سہولتیں فراہم کریں گے ۔ تقریب سے خطاب کرتے ہوئے وزیراعلیٰ سندھ ڈاکٹر ارباب غلام رحیم نے کہا کہ نارتھ ناظم آباد کراچی کا مرکز ہے اس علاقے نے ہر شعبے میں ملک ، صوبے اور شہر کی ترقی میں اہم کردار ادا کیا اس علاقے میں جیم خانہ کا قیام خوش آئند ہے ۔ انہوں نے کہا کہ حکومت اس کی تعمیر کیلئے ہر ممکن تعاون کریگی ۔ انہوں نے اس کی تعمیر کے سلسلے میں 5کروڑ روپے کی امداد کا اعلان کیا ۔ سٹی ناظم مصطفی کمال نے تقریب سے خطاب کرتے ہوئے کہا کہ جیم خانہ کا قیام حق پرست قیادت کا بڑا کارنامہ ہے ۔ حق پرست قیادت نے تعمیری رکاوٹوں کے ساتھ ساتھ مثبت سرگرمیوں ، کھیلوں کی سہولتوں کی فراہمی کیلئے بھی بے پناہ کام کیے ہیں ۔ انہوں نے جیم خانہ کی تعمیرکیلئے 5کروڑ روپے دینے کا اعلان کیا وفاقی وزیر بندرگاہ و جہازرانی بابر خان غوری نے کہا کہ شہر کے متوسط طبقے کیلئے جیم خانہ کی تعمیر قابل ستائش ہے اس جیم خانہ کے ذریعے شہریوں کو تفریح کی زیادہ سے زیادہ سہولتیں میسر ہونگیں ۔ تقریب سے نارتھ ناظم آباد کے رکن قومی اسمبلی کنور خالد یونس ، رکن سندھ اسمبلی بلقیس مختار نے بھی خطاب کیا جبکہ ٹاوٴن ناظم نارتھ ناظم آباد ممتاز حمید نے وزیراعظم کو جیم خانہ کے بارے میں بریفنگ دی ۔

__________________