خرم شہزاد خرم

گلکرسٹ ٹیم کی نائب کپتانی کیلئے تاحال بہترین کھلاڑی ہے،جان بکانن



میلبورن (جنگ نیوز) سابق آسٹریلوی کوچ جان بکانن نے مائیکل کلارک کو آسٹریلیا کی ٹوئنٹی20 ٹیم کی کپتانی دینے کا خیر مقدم کیا ہے تاہم ان کا کہنا ہے کہ کرکٹ آسٹریلیا (سی اے) کو ایڈم گلکرسٹ کی ریٹائرمنٹ تک ون ڈے اور ٹیسٹ ٹیموں کی نائب کپتانی کلارک کے حوالے کرنے میں جلدی نہیں کرنی چاہیے ۔بکانن نے کہاکہ گلکرسٹ کی آسٹریلوی ٹیم میں موجودگی ضروری ہے ۔ایک خبررساں ادارے کے حوالے سے بکانن نے کہاکہ ایڈم گلکرسٹ تاحال ایک ایسا فرد ہے جس سے ٹیم میں شامل بہت سے افراد بہت کچھ سیکھ سکتے ہیں ۔ گلکرسٹ کو نائب کپتان برقرار رکھنا ٹیم اور رکی پونٹنگ کیلئے ضروری ہے ۔ سابق آسٹریلوی کوچ نے کہا کہ کیریئر کے اس مرحلے پر نوجوان کھلاڑی ایڈم کے تجربے سے استفادہ حاصل کرسکتے ہیں ، ان کے پاس اب بھی ٹیم کو دینے کیلئے بہت کچھ موجود ہے ۔ بکانن نے کلارک کے میدان کے اندر اورباہر روےئے کی تعریف کی ۔انہوں نے کہا کہ کلارک ہمیشہ سیکھنے کا خواہشمند نظرآتا ہے اور سینئرز سے استفسار کرنے میں کبھی بھی نہیں ہچکچاتا ۔بکانن نے کہا کہ کلارک کی اپنی ایک شخصیت ہے تاہم اس کی شخصیت میں آسٹریلیا کے کئی بڑے کھلاڑیوں کا عکس موجود ہے۔ واضح رہے کہ ایڈم گلکرسٹ نے 20 ٹوئنٹی کرکٹ ٹیم کی قیادت مائیکل کلارک کو سونپے جانے پر ناراضگی کا اظہار کیا ہے۔