محمدعدنان

پاکستان کرکٹ بورڈ کے چئرمین ڈاکٹر نسیم اشرف نے اس تاثر کو غلط قرار دیا ہے کہ فاسٹ بولر شعیب اختر کو معافی دینے کے پس پردہ سیاسی محرکات کارفرما ہیں۔
واضح رہے کہ اتوار کی شب مشیر داخلہ رحمان ملک کی جانب سے مصالحت کے بعد ڈاکٹر نسیم اشرف نے شعیب اختر کے خلاف بائیس کروڑ روپے ہرجانے کا مقدمہ واپس لے لیا ہے جس کے بعد شعیب اختر آئی پی ایل کھیلنے بھارت روانہ ہوگئے ہیں۔

ڈاکٹر نسیم اشرف نے بی بی سی سے بات کرتے ہوئے کہا ’مجھے رحمان ملک صاحب نے کھانے پر مدعو کیا تھا جہاں انہوں نے مجھ سے درخواست کی کہ چونکہ شعیب اختر سرعام معافی مانگ چکے ہیں اور وہ آپ سے بھی معافی مانگنا چاہتے ہیں لہذا آپ بھی انہیں معاف کردیں۔‘

انہوں نے کہا کہ ’یہ نہ صرف رحمان ملک کی بلکہ آصف زرداری صاحب کی بھی خواہش تھی جس پر میں نے شعیب اختر کو کھلے دل کے ساتھ معاف کردیا ہے۔‘

پاکستان کرکٹ بورڈ کے چئرمین نے کہا ’پچھلے کچھ دنوں سے ایسی فضا قائم ہوگئی تھی اور یہ تاثر دیا جارہا تھا کہ جیسے شعیب اختر کے ساتھ میرا کوئی ذاتی مسئلہ ہے لہذا میں اس تاثر کو بھی غلط ثابت کرنا چاہتا تھا۔ میں اب بھی اس بات پر قائم ہوں کہ میرا شعیب اختر کے ساتھ کوئی ذاتی جھگڑا نہیں ہے۔‘

اس سوال پر کہ اگر شعیب اختر ایپلیٹ ٹریبونل کے سامنے بھی معافی مانگتے ہیں تو کیا پاکستان کرکٹ بورڈ اسی فراخدلی کا مظاہرہ کرے گا جس طرح اس نے شعیب اختر کے آئی پی ایل کھیلنے پر کوئی اعتراض نہ کرکے دکھائی ہے ؟ ڈاکٹر نسیم اشرف نے کہا کہ اس کا انحصار ایپلیٹ ٹریبونل پر ہوگا۔ وہ اپنے ہر فیصلے میں آزاد ہے اور پاکستان کرکٹ بورڈ اس کا ہر فیصلہ قبول کرے گا۔

انہوں نے کہا کہ وہ اپنے اس موقف پر اب بھی قائم ہیں کہ ڈسپلن پر کوئی سمجھوتہ نہیں کیا جائے گا۔

__________________