خرم شہزاد خرم

میڈرڈ (جنگ نیوز) عالمی نمبر ایک بیلجیئم کی ٹینس اسٹار جسٹن اینن آرڈین نے ڈبلیو ٹی اے ٹینس ٹورنامنٹ جیت کر سال میں دس ٹائٹل اپنے نام کرنے کا ریکارڈ قائم کر دیا۔ انہوں نے ڈبلیو ٹی اے کے فائنل میں عالمی شہرت یافتہ روسی کھلاڑی ماریا شراپوا کو ہرا کر چیمپئن شپ اپنے نام کی۔ میڈرڈ میں کھیلے جانے والے فائنل میں دونوں شہرت یافتہ کھلاڑیوں کے درمیان سخت مقابلہ ہوا تاہم جسٹن اینن آرڈین نے عمدہ کھیل کا مظاہرہ کرتے ہوئے روسی حریف کو 5-7، 7-5 اور 6-3 سے زیر کیا۔ اس کامیابی کے ساتھ انہوں نے سال میں 10 ٹائٹل جیت کر نیا ریکارڈ قائم کر دیا۔ اس سے قبل یو ایس اوپن اور فرنچ اوپن بھی جیت چکی ہیں۔ 2006ء کے ڈبلیو ٹی اے ٹینس ٹورنامنٹ کے فائنل میں بھی جسٹن اینن آرڈین اور ماریا شراپوا ہی آمنے سامنے تھیں جس میں عالمی نمبر ایک نے 6-2 اور 7-5 سے کامیابی حاصل کی تھی۔ ٹورنامنٹ جیتنے کے بعد جسٹن اینن آرڈین نے میڈیا سے گفتگو کرتے ہوئے کہا کہ وہ اپنی اس کامیابی پر بہت خوش ہیں۔ انہوں نے کہا کہ فائنل میں مقابلہ بہت سخت تھا۔ انہوں نے کہا کہ ماریا شراپوا کو ہرانے کے لیے سخت محنت کرنا پڑی۔ جسٹن اینن آرڈین نے مزید کہا کہ وہ اپنی فتوحات کے سلسلے کو آئندہ ٹورنامنٹس میں بھی جاری رکھیں گی۔ انہوں نے کہا کہ سال میں 10 ٹائٹل جیتنے کے ریکارڈ پر بہت خوشی ہوئی۔ انہوں نے کہا کہ 10 ٹائٹل جیتنے کا ریکارڈ قائم کرنا ان کے لیے اعزاز کی بات ہے جس کو وہ ہمیشہ یاد رکھیں گی۔

__________________