ابن ضیاء

نئی دہلی ... بھارتی کرکٹ ٹیم کا دورہ آسٹریلیا تعطل کا شکار ہو گیا ہے ،سڈنی ٹیسٹ میں غیر معیاری امپائرنگ اور پھر ہر بھجن سنگھ پر نسلی تعصب برتنے کے الزام میں تین ٹیسٹ کی پابندی کے باعث بی سی سی آئی نے بھارتی ٹیم کواگلا میچ کھیلنے کے لیے کینبرا نہ جانے کی ہدایت کی ہے ۔سڈنی میں بھارت اور آسٹریلیا کے درمیان گزشتہ روز ختم ہونے والے سیریز کے دوسرے ٹیسٹ کے اختتام پر آئی سی سی ریفری مائیک پروکٹر نے ہربھجن سنگھ پر نسلی تعصب پر مبنی گفتگو کرنے پر تین ٹیسٹ کی پابندی عائد کی تھی جبکہ ان کے ساتھ الجھنے والے اینڈریو سائمنڈز پر کوئی چارج نہیں لگایا گیا ،بھارت کرکٹ بورڈ نے میچ ریفری کے فیصلے کے خلاف آئی سی سی سے اپیل کا اعلان کیا ہے ،ساتھ ہی بھارتی ٹیم کو ہدایت کی ہے کہ وہ سڈنی سے باہر نہ جائے ،بھارت کرکٹ ٹیم کو پیر کو سڈنی سے کینبرا جانا تھا جہاں اسے اے سی ٹی اینوی ٹیشنل الیون کے خلاف دس جنوری سے دو روزہ میچ کھیلنا ہے ،دوسری جانب بھارتی بورڈ نے آئی سی سی سے یہ بھی اپیل کی ہے کہ ویسٹ انڈیز سے تعلق رکھنے والے امپائر اسٹیو بنکر کو تیسرے ٹیسٹ میں امپائرنگ سے روک دیا جائے ،بھارت کو سڈنی ٹیسٹ میں امپائرز کے چند متنازع فیصلوں کے باعث شکست کا سامنا کرنا پڑا تھا۔