عبدالقدوس

سڈنی ٹیسٹ: آسٹریلیا کے 4 وکٹ پر 282 رنز، 213 رنز کی برتری
سڈنی (جنگ نیوز) آسٹریلیا اور بھارت کے درمیان چار ٹیسٹ میچوں پر مشتمل کرکٹ سیریز کا دوسرا میچ ڈرا کے سفر پر گامزن ہے اور آسٹریلیا کی ٹیم نے اپنی دوسری اننگز میں 4 وکٹوں کے نقصان پر 282رنز بنا لیے ہیں اور اسے بھارت کے خلاف 213 رنز کی برتری حاصل ہے۔ تجربہ کار آسٹریلوی بیٹسمین میتھیو ہیڈن نے ایک مرتبہ پھر مشکل وقت میں عمدہ بیٹنگ کا مظاہرہ کرتے ہوئے سنچری اسکور کی وہ 123 رنز بناکر آؤٹ ہوئے۔ مائیکل ہسی 87 رنز پر کھیل رہے ہیں۔ بھارت کی طرف سے کپتان انیل کمبلے نے 3 وکٹیں حاصل کیں۔ ہفتہ کو میچ کے چوتھے روز کھیل شروع ہوا تو آسٹریلیا نے اپنی دوسری اننگز میں بغیر کسی نقصان کے 13 رنز بنا رکھے تھے اور اسے بھارت کی پہلی اننگز کا اسکور برابرکرنے کے لیے مزید 56 رنز کی ضرورت تھی۔ فل جیکس 8 اور میتھیو ہیڈن 5رنز پر کھیل رہے تھے۔ دونوں بلے بازوں کے درمیان پہلی وکٹ کی شراکت میں 85رنز بنے اور فل جیکس 42 رنز بنا کر آؤٹ ہوگئے۔ کپتان رکی پونٹنگ صرف ایک رنز بنا سکے۔ اس کے بعد میتھیو ہیڈن اور مائیکل ہسی کے درمیان تیسری وکٹ کی شراکت میں 160 رنز بنے اس دوران میتھیو ہیڈن نے اپنی سنچری اسکور کی وہ 123 رنز بنا کر انیل کمبلے کی گیند پر وسیم جعفر کے ہاتھوں کیچ آؤٹ ہوئے۔ میچ کے پہلے روز جب کھیل ختم ہوا تو آسٹریلیا نے اپنی دوسری اننگز میں چار وکٹوں کے نقصان پر 282 رنز بنا رکھے تھے اور اسے بھارت کے خلاف 213 رنز کی برتری حاصل تھی مائیکل ہسی 87اور پہلی اننگز میں 162رنز بنانے والے اینڈریو سائمنڈ 14 رنز پر کھیل رہے تھے۔ بھارت کی طرف سے انیل کمبلے نیتین اور ہربھجن سنگھ نے ایک وکٹ حاصل کی۔

__________________