عبدالقدوس

فٹبال رینکنگ :پاکستانی ٹیم 5 درجے تر قی کر کے 161نمبر پر پہنچ گئی
کراچی (اسٹاف رپورٹر) پاکستان فٹ بال ٹیم کی بہتر کارکردگی کی بدولت فٹ بال کی عالمی تنظیم فیفا کی جانب سے جاری کردہ رینکنگ میں اس کی پوزیشن مزید بہتر ہوگئی ہے۔ پاکستان ٹیم جو گزشتہ رینکنگ میں 166 ویں نمبر پر تھی اب اپنی پوزیشن5درجے ترقی کرکے 161 ویں نمبر پر پہنچ گئی ہے۔ فیفا کی جانب سے جاری کردہ تازہ رینکنگ کے مطابق ٹاپ فائیو رینکنگ میں کوئی تبدیلی نہیں آئی ہے۔ ارجنٹائن کی ٹیم 1519 پوائنٹس کے ساتھ بدستور پہلے نمبر پر ہے۔ برازیل کی ٹیم 1509 پوائنٹس کے ساتھ دوسرے، اٹلی کی ٹیم 1391 پوائنٹس کے ساتھ تیسرے نمبر پر ہے۔ اسپین کی ٹیم چوتھے، جرمنی پانچویں، چیک ری پبلک چھٹے اور فرانس کی ٹیم ساتویں نمبر پر ہے۔ یونان کی ٹیم مزید دو درجے بہتری کے ساتھ آٹھویں نمبرپر آگئی ہے۔ پرتگال اور ہالینڈ کی ٹیمیں ایک ایک درجے تنزلی کے ساتھ بالترتیب نویں اور دسویں نمبر پر چلی گئی ہیں۔ امریکا کی ٹیم نے بھی اپنی پوزیشن بہتر کی اور سات درجے ترقی کرکے 21 ویں نمبر پر پہنچ گئی ہے۔ ترکی کی ٹیم پانچ درجے تنزلی کے بعد ٹاپ 20 سے باہر ہوگئی ہے اب اس کی پوزیشن 23 ہے۔ اے ایف سی کپ کوالیفائنگ راؤنڈکے گروپ اے میں عمدہ کارکردگی کا مظاہرہ کرنے والی سری لنکن ٹیم کی پوزیشن پاکستان سے بہتر ہے اور اس کی تازہ رینکنگ 160 ہے۔ بھارتی ٹیم چھ درجے تنزلی کے بعد 154 ویں نمبر پر چلی گئی ہے۔

__________________