عبدالقدوس

نیاز اسٹیڈیم سے ون ڈے کی میزبانی واپس نہ لینے کا فیصلہ
کراچی (اسٹاف رپورٹر) پاکستان کرکٹ بورڈ نے حضرت امام حسین  کے چہلم اور 5 فروری کو کشمیر ڈے کی وجہ سے زمبابوے ٹیم کے دورے کو سابقہ شیڈول سے ایک ہفتہ قبل 2 فروری کو ختم کرنے کا فیصلہ کیا ہے تاہم سندھ کی صورتحال معمول پر آنے تک نیاز اسٹیڈیم حیدرآباد سے ون ڈے انٹرنیشنل کی میزبانی واپس نہ لینے کا فیصلہ کیا گیا ہے پی سی بی کے ایک اعلیٰ افسر نے ہفتے کو جنگ کو بتایا کہ زمبابوے کرکٹ یونین کو دورئہ پاکستان کا نظرثانی شدہ شیڈول بھیج دیا گیا ہے نئے پروگرام کے مطابق زمبابوے کی ٹیم 12 جنوری کو کراچی پہنچے گی پروگرام کے مطابق واحد چار روزہ میچ 14 جنوری کو نیشنل بینک کمپلکس میں پیٹرنز الیون کے خلاف کھیلا جائے گا۔ ذرائع کے مطابق نظرثانی شدہ پروگرام کے مطابق ون ڈے میچ کراچی، حیدرآباد، ملتان، فیصل آباد اور شیخوپورہ میں ہوں گے تاہم حیدرآباد کے لئے اسٹینڈ بائی کے طور پر قذافی اسٹیڈیم لاہور کو رکھا گیا ہے حیدرآباد کی انتظامیہ نے پی سی بی کو یقین دلایا ہے کہ ون ڈے میچ تک ہوٹل کا تعمیراتی کام مکمل ہوجائے گا اس لئے نئے شیڈول میں بھی حیدرآباد کو رکھا گیا ہے البتہ بورڈ کے حکام صورتحال کو مانیٹر کررہے ہیں اور صورتحال بہتر نہ ہونے کی صورت میں حیدرآباد کا میچ دورے کے آخر میں لاہور میں ہوگا۔ پی سی بی کے ڈائریکٹر ذاکر خان نے کہا کہ دورے میں ایک سہ روزہ میچ کو اس لئے کم کیا گیا ہے کیونکہ زمبابوے کی ٹیم 2 فروری کو دورہ ختم کرکے وطن روانہ ہوجائے گی بورڈ چہلم اور کشمیر ڈے کی وجہ سے دورہ قبل از وقت ختم کرنا چاہتا ہے۔

__________________