محمدعدنان

خواتین کی عالمی نمبر ایک ٹینس کھلاڑی بیلجیم سے تعلق رکھنے والی جسٹن ہینن نے فوری طور پر ریٹائر ہونے کا اعلان کر کے دنیا کو حیران کر دیا ہے۔
جسٹس ہینن ٹینس کی اولمپکس چیمپئن بھی ہیں اور وہ اس برس بیجنگ میں اپنے اعزاز کا دفاع نہیں کریں گی۔

سات گرینڈ سلیم ٹورنامنٹ جیتنے والی پچیس سالہ جسٹن ہینن کا کہنا ہے کہ ان کی ریٹائرمنٹ کا فیصلہ حتمی ہے۔ انہوں نے کہا کہ ’یہ ایک شاندار ایڈونچر کا اختتام ہے لیکن یہ ایک ایسا فیصلہ ہے جس کے بارے میں میں خاصے عرصے سے سوچ رہی تھی‘۔

جسٹن ہینن نے کہا کہ ان کا سفر ختم ہو گیا ہے اور یہ’ ایک بچے کے خواب کا خاتمہ ہے۔ میں نے ہر چیز کا تجربہ کرلیا ہے میں نے ٹینس کو مکمل طور پر جی لیا ہے اور مجھے اپنی کامیابی پر فخر ہے‘۔

ہینن گزشتہ ایک سو سترہ ہفتے سے خواتین کی عالمی درجہ بندی میں سر فہرست تھیں تاہم انہوں نے تھکن کی بنیاد پر حال ہی میں روم ماسٹرز اوپن سے اپنا نام واپس لے لیا تھا۔حالیہ ماہ میں جسٹن ہینن کی فارم میں کمی دیکھنے میں آئی تھی اور انہیں گزشتہ چار ماہ کے دوران چار بار شکست کا سامنا کرنا پڑا۔

ہینن نے اپنے ٹینس کیرئر کے دوران وومن ٹینس ایسوسی ایشن کے تحت ہونے والے اکتالیس مقابلے جیتے۔ وہ گزشتہ تین برس سے لگاتار فرنچ اوپن کی فاتح تھیں جبکہ اس کے علاوہ انہوں نے سنہ 2003 میں بھی فرنچ اور یو ایس اوپن، سنہ 2004 میں آسٹریلین اوپن جبکہ 2007 میں یو ایس اوپن جیتا تھا۔

__________________