عبدالقدوس

کراچی (رپورٹ/ اختر علی اختر) ممتاز مزاحیہ شاعر اور کالم نگار اطہر شاہ خاں جیدی نے کہا ہے کہ میں نے پہلی فلم ”آن“ لاہور کے مشہور سنیما صنوبر میں دیکھی تھی۔ اس وقت میری عمر دس برس تھی۔ اس زمانے میں ”آن“ فلم کی پبلسٹی بڑے پیمانے پر کی گئی تھی۔ دلیپ کمار کی اداکاری کے بہت چرچے تھے۔ جنگ کے مقبول سلسلے ہم بھی سنیما دیکھا کرتے تھے میں بات چیت کرتے ہوئے انہوں نے کہا کہ ہم لوگ عام طور پر عید کے موقع پر فلم دیکھا کرتے تھے۔ ”آن“ فلم کیلئے میں نے بڑے بھائی کے ساتھ سنیماؤں کا جائزہ لینا شروع کیا۔ پندرہ روز تک ہم مسلسل سنیماؤں کے چکر لگاتے رہے۔ آپ کو یہ جان کر حیرت ہوگی کہ فلم کے شائقین نے سنیما کے ٹکٹ حاصل کرنے کیلئے قطار میں بستر ڈال دیئے تھے۔ بزرگ حقہ اور کھانے پینے کا سامان ساتھ لے کر آئے تھے۔ ٹکٹ لینے والوں نے عام طور پر صرف بنیان پہنی ہوتی تھی‘ کیونکہ قمیض کا سلامت رہنا بہت مشکل بلکہ ناممکن تھا۔ ٹکٹ کے حصول کیلئے زیادہ سے زیادہ طاقت کا استعمال کیا جاتا تھا۔ بڑے بھائی کے ایک دوست نے ہمیں پندرہ دن کی مسلسل محنت کے بعد ٹکٹ لاکر دی۔ انہوں نے کہا کہ فلم ”آن“ کے گانے بہت اچھے تھے۔ ”مان میرا احسان ارے نادان“ جب چلتا تھا تو لوگ اسکرین پر پیسے نچھاور کرتے تھے۔ بڑے بھائی کو آن بہت اچھی لگی تو انہوں نے مسلسل تین شو دیکھے۔ اطہر شاہ خاں جیدی نے مزید بتایا کہ فلم بہت بڑی تفریحی ہوا کرتی تھی۔ اب اٹھارہ سال بعد میں نے سنیما میں ”خدا کیلئے“ فلم دیکھی جو مجھے بہت پسند آئی۔ ”خدا کیلئے“ کے بعد خواتین نے بھی سنیماؤں کا رخ کیا ہے۔ جیدی نے بتایا کہ مجھے موسیقی سننے کا بھی شوق ہے۔ مہدی حسن‘ محمد رفیع‘ لتا اور نور جہاں کے گیت شوق سے سنتا ہوں۔ میرا پسندیدہ گانا ”اکیلے نہ جانا مجھے چھوڑ کر“ بہت پسند ہے۔ حالانکہ اس عمر میں یہ گانا گنگنانا خطرے کا باعث بن سکتا ہے۔ میں خود بھی گانے گاتا ہوں مگر بیگم اور بچے مجھے گانے کا شوق پورا نہیں کرنے دیتے۔

__________________