پریشان نہیں ہونا اللہ نے کرم کیا ہے خرم بھائی کے ولیمے پر سوائے اس عظیم المیے کےاور کوئی سانحہ رونما نہیں ہوا۔
یہ کہ جناب راجہ صاحب ،عبداللہ آدم اور موجو میاں شریک نہ ہوسکےآپ کہیں گے کہ اس میں پریشانی کی کیا بات ہے۔

بھائی اگر پریشانی کی بات نہ ہوتی تو خرم بھائی ہماری یہ درخواست قبول کرچکے ہوتے کہ اگلے اتوار دوبارہ ولیمہ کر لیتے ۔

پڑھیے احوال المیہ ولیمہ اور آنسو بہائیے ہماری محرومی پر ۔

ایک عرصے سے ہم دیکھ رہے تھے کہ جناب قبلہ راجہ صاحب اچانک بیٹھے بیٹھے کھڑےہوجاتے ہیں پھر کھڑے ہی نہیں رہتے بلکہ پریشانی کے عالم میں تیز تیز چلنا شروع کردیتے ہیں پھر چلتے چلتے گھر سے باہر نکل جاتے ہیں راتوں کو ہڑبڑا کر اٹھ بیٹھتے ہیں اور انٹرنیٹ پر سرفنگ کرتے ہوئے اچانک کسی گہر سوچ میں غرق ہوجاتے ہیں اور تو اور اسی دوران میں راجہ صاحب پر آمد شروع ہوگئی جنوں کی نہیں اشعار کی اور وہ بھی بحر در بحر ۔

ہم بڑے دن اس ٹوہ میں رہے، کہ معاملہ آخر ہے کیا ؟ جس نے راجہ بھائی کو اتنا پریشان کر چھوڑا ہے، بس پھر ایک دن راجہ بھائی نہ رہ پائے، اور ہم پر وہ راز منکشف کردیا جسے سن کر ہمیں بھی پریشانی لگ گئی یا خدا یہ کیا ہوگیا ۔ معاملہ ایک شادی کا تھا اور شادی بھی ہمارے ہردل عزیز شاعر جناب خرم بھائی کی، اب اس میں راجہ بھائی کو کیا کیا چیزیں پریشان کئے دے رہی تھیں، وہ چند ایک تو ہمیں معلوم ہوگئیں اور چند ایک پر ابھی تک پردہ ہے اورہم راجہ صاحب کے پیری مریدی والے سفید دھندے سے بھی آگاہ ہیں، اس لیے یہ پردہ راجہ صاحب خود ہی اٹھائیں تو اٹھائیں ہم نے اٹھایا تو ہم خود بھی ساتھ ہی اٹھ جائیں گے۔

تو جناب تیاریاں شروع ہوگئیں کچھ دن تک راجہ صاحب نے کھانا بھی اچھے طریقے سے نہیں کھایا کوئی برا گمان نہیں کرنا راجہ بھائی کے منہ میں چھالے پڑ گئے تھے اس لئے یہ معاملہ ہو رہا تھا.

پھر ایک دن مرید پنڈی عبداللہ آدم تشریف لے آئے ان کی حالت بھی دیدنی تھی سر پر بکھرے بال ، ناک پہ ٹیرھی عینک اور تن پر سفید لباس یہ طفل آدم بھی ولیمہ کے بے حد مشتاق پائے گئے آجکل ان کی تیاریاں بھی زوروں پر تھیں تیاریاں کیا تھیں صبح کی سیر کا آغاز کردیا گیا تھا اس کے علاوہ لیاقت باغ دوڑ لگانا ، ورزش کے ذریعہ افعال معدہ میں تیزی لانا شروع کردی گئی تھی۔

دن یونہی گزرتے رہے 22 ستمبر کو دلہا میاں خود اپنی شادی کی دعوت دینے تشریف لائے پیر عالی نے ان کی دعوت کو شرف قبولیت بخشا (اندر کی بات تو میں بتا ہو چکا ہوں) تیاریوں نے زور پکڑ لیا روزانہ مشورے ہوتے کہ اتنے بجے نکلیں گے اور مقررہ وقت سے پہلے پہنچیں گے شادی پر فلاں صاحب بھی آرہے اور فلاں بھی ان سے بھی ملاقات ہوجائے گی کبھی یہ سوچا جاتا کہ جہلم قریب ہے یا راولپنڈی کے اندر ڈھوک حسو۔ 24 ستمبر کو راجہ صاحب نے یہ خوشخبری سنائی کہ 26 ستمبر کو موصوف ہائیر ایجوکیشن کمیشن سے متھا لگانے جارہے ہیں یعنی NTS کا ٹیسٹ ہے ایم فل کے لئے تو جناب مت پوچھئے ہمارا کیا حال ہوا-
خیر اللہ اللہ کر کے آگیا دن 26 ستمبر 2010 کا۔

یہی وہ دن ہے جس کے لئے ایک ایک لمحہ انتظار کیا گیا تھا اسی روز سعیدکو فخر راولپنڈی خرم شہزاد رشتہ ازدواج میں منسلک ہونے کی خوشی میں دعوت ولیمہ دے رہے تھے مگر اس سے پہلے راجہ صاحب نے این ٹی ایس کا ٹیسٹ دینا تھا ہمیں خرم بھائی بغیر ٹیسٹ کے ہی ولیمہ کھلانے کو تیار تھے مگر راجہ صاحب کے لئے نہ جانے کیوں یہ کڑی شرط رکھ دی گئی تھی ، اس پہلو پر روشنی راجہ صاحب یہ دلہا میاں ڈال سکتے ہیں ۔

ہم نے ایک بجے انہیں امتحان گاہ پہنچایا وہاں پہنچے تو اب کہ راجہ صاحب نے ایک اور خوش خبری سنائی کہ میرا اصل شناختی کارڈ گھر پر رہ گیا ہے اسے بھیج دیں ہم خوشی سے دانت پیستے ہوئے اصل شناختی کارڈ لینے چل پڑے چند منٹ میں انہے واہ بائک چلاتے ہوئے ان تک شناختی کارڈ پہنچایا راجہ صاحب تو داخل ہوگئے امتحان گاہ میں اور ہم واپس گھر تشریف لے آئے نماز ظہر کے بعد انتظار شروع ہوگیا کہ موصوف کا موبائل جونہی چالو ہو تو انہیں لینے چلا جاؤں ۔ 2 بج کر بیس منٹ پر مرید پنڈی کا ایس ایم ایس موصول ہوا پیر مکرم کے انتظار میں امتحان گاہ کے قریب موجود تھے اور پیر صاحب کا موبائل بند تھا۔

راجہ جی نے اپنا رخ انور 3 بج کر 40 منٹ پر دکھا یا خرم بھائی کو فون کیا گیا تو معلوم ہوا کہ راجہ صاحب کے نہ آنے کے غم میں لوگوں نے تناول ماحضر کے چیتھڑے اڑا کررکھ دئیے تھے ولیمے کے اس اندوہناک حادثے کی تاب نہ لاتے ہوئے مرید پنڈی نے اپنے پیر و مرشد کی طبع نازک پر ایک عدد گرم گرم چکن کڑاہی رکھ دی 5 بج کر 40 منٹ پر خرم بھائی کے بغیر ہی ان کا ولیمہ سیور پر سرو کر لیا گیا۔



اگلی قسط مرید پنڈی کی طرف سے آئے گی ان شاء اللہ

__________________
قولوا لناس حسنا (لوگوں سے اچھی بات کہو(