درجہ بندی: (1 votes - 5.00 average)

ساتھیو جس طرح کیمبلپور کے شیریں نام کے ساتھ غنڈہ گردی کرتے ہوے اس کو اٹک بنایا گیا اور بعد ازاں اٹک سٹی کا نام دیا گیا ، اسی طرح ہمارا پیارا کیمبلپور کالج گورنمنٹ کالج اٹک بنا اور اب اس کا نام گورنمنٹ پوسٹ گریجوئیٹ کالج اٹک ہے ، زمانے کے ساتھ ساتھ تمام چیزیں بدلتی ہیں لیکن اس کالج کا حلیہ ، نظام اور اس میں نظر آنے والے چہرے کچھ اس تیزی سے بدلے کہ ہم جیسے ماضی پرست تو انگشت بدنداں رہ گئے ، ہمیں اس کالج میں پڑھنے کے دوران ہی اس کی تیزی سے بگڑتی اخلاقی ، تعلیمی اور سیاسی حالت کا احمساس ہو چکا تھا ، اور چونکہ ہم سمجھتے ہیں کہ جس طرح گھر کا سربراہ اس گھر کے بننے اور بگڑنے کا ذمہ دار ہوتا ہے اسی طرح کسی کالج کے اچھے یا برے مستقبل کا ذمہ دار براہ راست اس کالج کا پرنسپل ہوتا ہے ، اسی لیئے کالج کے سالانہ مشاعرہ 1995میں جو کہ جناب محترم انور مسعود صاحب کی صدارت میں منعقد ہوا تھا ، ہمیں بھی ایک غزل پڑھنے کی سعادت نصیب ہوئی اور جناب پرنسپل صاحب کی موجودگی میں ہم نے دھڑلے سے سٹیج پر آ کر اپنے دل کی بھڑاس نکالی تھی ، آج سوچا کہ اپنے اس دور کی ایک یاد آپ کے ساتھ بانٹ لوں ، عرض کیا تھا ۔
اچھا ہمیں لگتا ہے یہ چلتا ہوا کالج
سیلاب جہالت کا اگلتا ہوا کالج
کن ہاتھوں سے کن ہاتھوں میں پہنچا ہے میرے یار
ہائے کف افسوس یہ ملتا ہوا کالج
سیاست کی کڑی دھوپ ہے نفرت کی تپش ہے
اور برف کی مانند پگھلتا ہوا کالج
سینے سے لگا لو اسے دنیا سے بچا لو
یارو کوئی دیکھو میرا جلتا ہوا کالج
کچھ اس کو بزرگوں کی دعا ہے کہ ہے قائم
گرتا ہوا کالج یہ سنبھلتا ہوا کالج
دیکھیں بھی تو ہم سے علی دیکھا نہیں جاتا
روتا ہوا کالج یہ مچلتا ہوا کالج
اب یہ ہمارا پرجوش مزاج تھا یا ہم کالج کی زبوں حالی پر کچھ زیادہ ہی جل کڑھ رہے تھے ، کہ نا جانے کیسے ۔ ۔ ۔
کن ہاتھوں سے کن ہاتھوں والے شعر میں ہمارے ہاتھ کا شارہ جناب پرنسپل صاحب کی جانب ہو گیا ، ہم تو غزل پڑھ کر سٹیج سے اتر آئے اور اس وقت پرنسپل بھی چپکے ہو رہے لیکن سزا ہمیں بعد میں کڑی ملی ، ہوا یہ کہ بی اے کا داخلہ بھجوانے کے لیئے فیس جمع کروانے کا نوٹس لگا ، اور ہم جب بھی فیس لے کر آفس کی کھڑکی پر گئے ، ہمیں بتایا گیا کہ آج فیس جمع نہیں ہو گی آپ کل آ جائیں ، تمام دن فیس جمع ہوتی اور جس وقت ہم کھڑکی پر جاتے تو کل پر بات ٹل جاتی ، آخر ایک دن ہمیں غصہ آ گیا اور ہم نے کلرک کو ڈانٹ دیا کہ یہ کیا تماشا بنایا ہوا ہے ،
اس بے چارے نے معزرت بھی کی اور کہا کہ دو تین دن کے اندر دوبارہ فیس جمع کرنے کا کام شروع کریں گے
اسی دوران نوٹس بورڈ پر نیا نوٹس ہمارا منہ چڑا رہا تھا ، جس میں ہمارے ساتھ تیس پینتیس اور طلبہ کے نام بھی تھے ، جن کو کالج سے نکال دیا گیا تھا
وجہ بروقت فیس جمع نہ کروانا تھا ۔
ہم نے اس پر بہت احتجاج کیا لیکن ہماری نہ سنی گئی
پرنسپل صاحب جمیعت کی سائڈ پر تھے اور چونکہ ہم کسی بھی سائڈ پر نہ تھے اس لیئے ہماری دال گلنا مشکل تھی ۔ ہمارے مارشل آرٹ تنظیم کے ساٹھ ستر طلبا نے احتجاج کا پروگرام بنایا لیکن ہم نے انہیں یہ کہ کر روک دیا کہ یہ ایک مارشل آرٹسٹ کی توہین ہے کہ وہ اس جیسے چھوٹے چھوٹے مسائل پر کالج میں تعلیم کا سلسلہ رکواتا پھرے ۔