کبھی کبھی آپ کے ساتھ ایسا واقعہ ہو جاتا ہے کے اُس میں موجود کوئی باریک سا لطیف نکتہ اُسے ایک لطیفہ میں تبدیل کردیتا ہے اور آپ کو دیر تک مسکرانے پر مجبور کردیتا ہے۔
میں اپنے گھر سے آفس آنے کے لیئے پبلک ٹرانسپورٹ کا استعمال کرتا ہوں۔ ابھی کچھ دن پہلے میں آفس سے واپسی کے لیئے ویگن/مزدا میں سوار ہوا خوش قسمتی سے پچھلی سیٹو ں میں جگہ مل گئی ۔ سیٹ پر بیٹھ کر میں نے ایک نظر وین میں ڈالی تو محسوس کیا کے آج کسی کالج/یا یونی ورسٹی کے کچھ لڑکے بھی ویگن میں موجود تھے۔ کچھ ہی دیر بعد ایک باریش صاحب پولیس کی وردی میں ویگن میں سوار ہوئے، اُنھیں دیکھ کر اگلی سیٹ پر بیٹھے ایک لڑکے نے اُنھیں جگہ پیش کی ۔ اُن صاحب نے انکار کرنا چاہا مگر اُ س لڑکے کے اصرار پر وہ سیٹ پر بیٹھ گئے۔اُن صاحب کا تعلق یقینا کسی دینی و تبلیغی جماعت سے تھا کیونکہ کے اُنہوں نے بیٹھتے ہی قدرے اُونچی آواز سے اپنے برابر والی سیٹ اور خود کو جگہ دینے والے لڑے کو مخاطب کو بلند آواز سے سلام کرکے گفتگو شروع کردی تھی۔
گفتگو سیاست کے موجودہ بازیگروں سے ہوتی ہوئی، اسلام کے شاندار ماضی کا احاطہ کرتے ہوئے موجودہ دور کے مسلمانوں کی ذلت آمیز بے چارگی کی وجوہات تک جا پہنچی تھی، اُن کی اس گفتگو کومجھ سمیت ویگن کے سبھی مُسافر شوق و محویت سے سُن رہے تھے اور کچھ تو اُن کی حمایت میں کچھ دلائل بھی دے رہے تھے۔ اُن صاحب نے اب اس بات پر زور دینا شروع کیا کے ہمیں اپنے طور پر اسلام کی تبلیغ کرنی چاھیئے، اسی اثنا میں اُن نے قرآن کی ایک آیت مبارکہ پڑھی"و من یعمل مثقال ذرۃ شرا یرہ" اوراس آیت کا ترجمہ کیئے بنا پرزور آواز میں کہنے لگے "اللہ کے بندوں اللہ کے یہاں ایک ایک مثقال کا جواب دینا پڑے گا"۔ میں نے نوٹ کیا کے اُن کی یہ بات سنتے ہی ویگن میں موجود لڑکوں کے کان کھڑے ہوگئے اور وہ خوف ذدگی کے عالم میں اُن صاحب کی جانب دیکھنے لگے۔ جانتے ہیں کیوں؟
ارے بھئی عربی سے ناواقفیت کی بنا پراُن نادان لڑکوں نے سمجھا کے وہ صاحب کہہ رہے ہیں کے اللہ کے یہاں ایک ایک "مس کال" کا حساب دینا پڑے گا۔