دوستو ایک دفہ کا ذکر ہے کہ ایک ملک خداداد جو کہ اسلام کے پرکشش نعرے سے وجود میں آیا تھا ، وہاں کے بادشاہ کو رعایا کے پرزور اسرار اور کالے کوٹوں والی مخلوق خدا جس کو عرف عام میں وکیل کہا جاتا ہے ، ان کی شدید تحریک نجات کے بعد معزول کرنے کی تیاریاں ہو رہی تھیں اور اس ملک کی بادشاہت کے فیصلے کی گھڑی سر پر تھی ۔
یہاں بظاہر لوگوں کے اطمینان کے لیئے جمہوریت کا ڈھونگ خوب تیاریوں کے ساتھ رچایا جاتا تھا ، سو اس بار بھی تمام تر میک اپ اور لیپا پوتی کے ساتھ یہ ڈراما آغاز ہوا چاہتا تھا کہ کارکنان قضا و قدر بلکہ خدا وند مجازی بے غیرتاں کی ایک جنبش ابرو سے کھیل میں حصہ لینے والی ایک شہزادی کو شہید کر دیا گیا ۔
عوام الناس کی سمجھ میں کچھ نہ آیا ۔ ارباب حکومت انگشت بدنداں رہ گئے اور خدا وند مجازی بے غیرتاں کی منصوبہ بندی کے مطابق ہر ایک شعبہ ہائے زندگی کا رد عمل ویسا ہی سامنے آیا جیسا کہ متوقع تھا ،
اب دنیا کا دستور تو یہ ہے کہ کسی بھی قتل کے بعد دیکھا یہ جاتا ہے کہ اس سے سب سے زیادہ فائدہ کس کو پہنچا لیکن یہاں تو نرالے اصول وضع کر لیئے گئے تھے لہذا تفتیش کے نام پر وزرا اور امرا کے مشوروں کے مطابق ہر روز ایک نیا کھیل کھیلا جانے لگا ، لیکن اصل منصوبہ کامیابی سے اپنے منتقی انجام کی جانب بڑھ رہا تھا ،
اور وہ انجام ایک انتہائی قابل شخص کی بادشاہت کی صورت میں سامنے آیا ۔
اس مملکت خداداد کا نو منتخب شدہ بادشاہ دنیا میں اپنی مثال آپ تھا ، اس کی مخصوص صلاحیتوں اور لیاقتوں کی ایک دنیا معترف تھی حتی کہ غیر ممالک میں مقیم اس مملکت خداداد کی اخبار نویس برادری بھی اس کے بیرون ملک کارناموں اور بین الاقوامی تعلقات عامہ کی صلاحیتوں کی تعریف میں ہمیشہ زمین و آسمان کے قلابے ملائے رکھتی تھیں ۔
جیسا کہ عوام الناس میں موجود کچھ سوچنے والے اذہان کو پہلے سے اندازہ ہو گیا تھا ، اس بادشاہ نے تخت پر بیٹھتے ہی اپنے مزاج کے مطابق کچھ مخصوص اقدامات کیئے ، اور عوام الناس کے گلے میں ایک ایک کر کے مختلف گل ہائے مصائب کے ہار ڈالنے شروع کر دئیے ، چونکہ خدا وند مجازی بے غیرتاں بہ موسوم امریکہ کو یہ بات سخت ناگوار گزری تھی کہ اس کے چہیتے بادشاہ کو ایک جاہل ملک کی جاہل عوام نے مسترد کرنے کی ہمت کیسے کی ؟ ، لہذا اس نے اس کمزور ملک کی عام کو بدلے میں ایسے بادشاہ کا تحفہ دیا جس کے "حسن سلوک " کو دیکھتے ہوے عوام الناس چیخ اٹھنے پر مجبور ہو گئے کہ واللہ اس سے تو سابقہ بادشاہ اچھا تھا ۔
اب عوام الناس کی کیفیت اس ڈھانچے جیسی تھی جو کہ استخوان شکستہ کا مجموعہ ہونے کی وجہ سے کسی بھی وقت ریزہ ریزہ ہو کر بکھرنے کو تیار ہو اور جناب بادشاہ سلامت اس ڈھانچے کے گلے میں نئے سے نئے ہار ڈالنے کو بے تاب نظر آتے ، بیچارے اکیلے بادشاہ پر ہی کیا موقوف وزرا حضرات بھی کسی سے کم نہ تھے اور شاید ان کے لاشعور میں ایک خوف بیٹھا تھا کہ اگر عوام نے ایک صاحب جبروت بادشاہ کو تخت سے اتار پھینکا تو ان احمقوں کو کتنی مدت تک برداشت کرے گی ؟
لہذا ان وزرا نے بھی اپنی حکومت کو بچہ سقہ کی مختصر المدت حکومت جان کر عام کی چام کے سکے چلانے کی بھرپور کوششیں شروع کر دیں ، ہاں بادشاہ وقت کی ایک بہت بڑی عقل مندی اس کے بھرپور کام آتی رہی کہ اس نے اپنا وزیر اعظم اس شخص کو منتخب کیا جس کا کچھ بھرم ابھی عوام الناس میں باقی تھا ،
اس ملک خدا داد میں کسی کی جرات نہ تھی کہ بادشاہ وقت کے خلاف بول سکے جو بولنے کی کوشش کرتا اسے زنداں میں ڈال دیا جاتا ۔ ایسے حالات میں جب یہ نوشتہ دیوار صاف نظر آ رہا تھا کہ غریب خط غربت سے نیچے گرتے گرتے ہلاک ہونے کے قریب پہنچ چکا ہے اور ظلم کے خاتمے کی کوئی صورت نظر نہیں آتی تھی ، کہ بادشاہ سلامت سے اللہ تعالی نے کچھ ایسی حرکات کروائیں کہ سوئی ہوئی بلکہ مردہ عوام ایک جھرجھری سی لے کر اٹھ بیٹھی ، کیوں کہ ایک تو اب بھوک ناقابل برداشت تھی دوسرے فرنگیوں کی ایجاد برق ناہنجار جو کہ گرمیوں کی شدت میں عوام کی واحد تسکین و عیاشی تھی وہ بھی اس سے چھین لینے کے احکامات نافظ کر دئیے گئے تھے ، آخر کو اپنے وزرا اور حمائیتوں کو ان کی فیکٹریوں اور کارخانوں کے لیئے وہی برق ناہنجار ہی تو مہیا کرنا تھی ، عوام کے منہ میں ساری ڈال دیتے تو ان کے آگے کیا ڈالتے اور نہ ڈالتے تو ان کی بھونک کون برداشت کر سکتا تھا ۔
اس قوم کا ایک بوڑھا جس نے حالات کے تھپیڑے کھا کھا کر ایک عمر گزار دی تھی ۔ بڑا پر امید تھا ، اس کا کہنا تھا کہ جب کسی حکمران کے خلاف عوام الناس سڑکوں پر آجائے تو اس سے جان چھڑانا مشکل نہیں رہتا ،
کیا معلوم مستقبل کی مٹھی میں اس مملکت خدا داد کی عوام کے لیئے کیا رکھا ہے ۔ لیکن تاریخ اس بات کی گواہ ہے کہ اس غریب ملک کی قسمت میں ہمیشہ پہلے سے کہیں زیادہ سلیقہ مند وفا شعار اور سمجھدار ، غیرت مند ، حمیت و اخوات و مساوات کا پیرو بادشاہ ہی آیا تھا کیا پتا کل آنے والے کے کارنامے اور صلاحیتیں دیکھ دیکھ کر عوام الناس کہ رہے ہوں کہ اس سے پہلے والا اچھا تھا؟
اس ملک خدا داد کا عام آدمی آج ایک دعا مزید شدت سے مانگتا نظر آتا ہے ۔
صاحبان اقتدار کو اس کی اس دعا کی سمجھ نہیں آتی
کیا آپ اس کا مفہوم پا سکتے ہیں ۔
دعا سن لیجئیے
یا اللہ بے غیرتوں کو غیرت عطا کر
بے حس درندوں کو تہزیب کے پردے میں خون پینے کی صلاحیتوں سے محروم کر دے
یا اللہ تجھے تیری کریمی کا واسطہ ظاموں کو نیست و نابود فرما دے ،
بے حیائوں کو حیا بخش دے ۔
شرابیوں کو نمازی بنا دے تا کہ ام الخبائس ان سے چھٹ جائے ۔
مغلوب گناہ بے حمیت لوگوں کو پارسا بنا دے مولا
خبیث الدہر ترین اشخاص کو بھی اپنی رحمت کے سائے تلے نیکی کی راہ پر لے آ ۔
مولا تیرے نام لیوا ہیں تجھی سے مانگتے ہیں ، اس ملک پاک کی غریب عوام کی سن لے مولا ،
اگر اس دعا کا مفہوم سمجھ آ جائے تو ہمیں ضرور بتائیے گا ۔