انٹر نیٹ پراردو بلاگنگ روز بروز مقبول ہو رہی ہے، خوبصورت اردو فونٹس کی انٹرنیٹ پر دستیابی کے بعدقارئین کا اردو ویب صفحات پڑھنے اوراردو لکھنے کا رحجان بڑھتا جا رہا ہے، دیگر کمیونٹی سائٹس جیسے فیس بک اور گوگل بز پربھی اکثر اوقات اردو میں تحاریر پڑھنے کو ملتی ہیں۔ شاید اس کی بنیادی وجہ یہی ہےکہ انسان اپنی اصل سے دور نہیں بھاگ سکتا، کمپیوٹر اور انٹرنیٹ استعمال کرنے والے بیشتر اردو قارئین ایسے ہیں جو انگریزی زبان کی کچھ نہ کچھ سوجھ بوجھ رکھتے ہیں پھر بھی انہیں اگر کسی ویب سائٹ پر اردو یا انگریزی میں معلومات حاصل کرنے کا اختیار ملے تو بلاشبہ وہ اردو ہی کو اختیار کریں گے۔

اردو بلاگنگ کو مقبول بنانے میں اور لوگوں کو اس کی طرف مائل کرنے کے لیے بہت سارے لوگ بنا کسی لالچ کے خدمات سرانجام دے رہے ہیں، اسی سلسلے میں، میں نے دو نئے اردو بلاگ بنانے میں کچھ حد تک کردار ادا کیا ہے، ایک بلاگ میرے ایک دوست محمد اختر صاحب کا جس کا ربط یہ ہے ۔ محمد اختر صاحب سے دوستی کچھ زیادہ پرانی نہیں، پاکستان سے تعلق رکھتے ہیں اور میری طرح یہاں ایک فرم میں ملازمت کرتے ہیں۔ اختر صاحب نے مجھ سے بلاگنگ کے بارے میں جاننا چاہا اور اپنا بلاگ بنانے کا ارادہ بھی ظاہر کیا تو میں نے انہیں اس سلسلے میں کچھ تجاویز اور مدد فراہم کی، بقیہ وہ اپنے بلاگ پر لکھتے رہیں گے اور انشاء اللہ ایک اچھے بلاگر ثابت ہوں گے۔ ان کے متعلق مزید تفاصیل آپ ان کے بلاگ سے جان سکتے ہیں۔

دوسرا بلاگ ایک نیا اردو بلاگنگ ایگریگیٹر ہے جس کا ربط یہ رہا۔ یہ ایگریگیٹر اردو بلاگنگ کمیونٹی کے سارے بلاگز کی تازہ ترین تحاریر بذریعہ آر ایس ایس ایک صفحہ پرمہیا کرے گے، ابھی میں اس پراجیکٹ پر کام کر رہا ہوں۔ اور کوشش ہے کہ اس پراجیکٹ کو پہلے سے موجود پراجیکٹس سے عمدہ اور نمایاں بنایا جائے۔ اس ایگریگیٹر میں، میں نے اپنی معلومات کے مطابق اردو بلاگز شامل کر دیے ہیں، کچھ بلاگ جن کی آر ایس ایس فیڈ میں کچھ مشکل آ رہی ہے اس پر بھی کام جاری ہے، اگر کسی صاحب یا صاحبہ کا بلاگ رہ گیا ہو تو وہ مجھ سے رابطہ کر کے اسے شامل کروا سکتے ہیں۔ اپنی تجاویز یا رائے سے ضرور آگاہ کیجیے۔ بہت شکریہ۔
ماخذ

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com