ویسے تو ہم آج جس دور میں رہتے ہیں وہ بھی کسی طلسم ہوش رُبا کا منظر نامہ پیش کرتا ہے کہ جہاں جادُوئی طاقتیں ہم پر حکمرانی کر رہی ہیں ، ہم انکے سامنے یوں بے بس ہیں گویا ہم کو سحر کی بیڑیاں لگی ہوئی ہوں، سرحدوں پر آگ کی دیواریں کھڑی کر دی گئی ہوں اور ہم حزن و یاس کی تصویر بنے کسی امیر حمزہ کا انتظار کر رہے ہوں کہ کب اسکی طاقتور افواج آ کر اس طلسم کا خاتمہ کرتی ہیں ۔

لیکن ابھی میں جس طلسم کا تذکرہ کرنے جا رہا ہوں اُس طلسم کا نام "طلسم ہوش رُبا" ہے جس کا کُچھ نا کُچھ حصہ ہم میں سے اکثر نے اپنے بزرگوں سے ضرور سُنا ہو گا۔ پنجاب کی ایک اچھی رِیت جو جدیدیت کی نظر چڑھ گئی وہ چوپالوں کا ختم ہو جانا ہے ۔کسی زمانے میں ان چوپالوں پر گلی محلے کے لوگ شام کے بعد اکھٹے ہوتے تھے، ایک دوسرے کے ساتھ دُکھ سُکھ بانٹتے تھے اور "ماہیے""ہیر"، داستانیں سُنایا کرتے تھے۔ ان داستانوں میں سب سے مشہور داستان "داستان امیر حمزہ" یا "طلسم ہوش ربا" تھی۔ لیکن اب جدید ابلاغ نے harry potter,Benten,spiderman, batman, hulkجیسی عارضی داستانوں کا عادی کر کے ہم سے ملنے ملانے کا وہ بہانہ چھین لیا ہے۔

کہا جاتا ہے کہ داستان امیر حمزہ ساتویں صدی کے عرب میں نبی کریم صلی اللہ علیہ وسلم کے چچا امیر حمزہ کی شجاعت اور کارناموں کو داد دینے اور یاد رکھنے کے لیے سُنائی جاتی تھی۔۔ جیسے جیسے مسلمانوں کی حکومت کرہ عرض پر پھیلتی چلی گئی ویسے ویسے یہ داستان بھی نئے مسلمانوں تک پہنچی۔ہر نیا سُنانے والا جوش عقیدت میں چند نئے کارناموں کا اضافہ کر دیتا۔اس طرح یہ داستان آہستہ آہستہ طوالت اختیار کرنا شروع ہو گئی۔ پھر مسلمانوں کی حکومت فارسیوں کے ہاتھ آ گئی۔ فارسی تمدن اور ادب میں عربوں سے بہت آگے تھے۔ جب یہ داستان فارس پہنچی تو اس داستان میں مقامی رنگ شامل ہو گیا۔ اور آہستہ آہستہ اس مقامی رنگ نے اس داستان کو محض ایک داستان یعنی تخیلاتی روپ دے دیا۔ امیر حمزہ اب ایک تخیلاتی ہیرو بن گئے۔

گیارہویں اور چودھویں صدی کے درمیان میں "داستان امیر حمزہ" نے ہندوستان کا رُخ اختیار کیا ۔ بادشاہ اکبر نے جب یہ داستان سُنے تو وہ اسکا دیوانہ ہو گیا اور اُس نے 1562 میں "عظیم مغل سٹوڈیو" میں اس داستان کی منظر کشی کا حکم دیا۔ 1400 سے زائد جہازی سائز کی تصاویر میں اسکے ہر باب کی منظر کشی کی گئی۔ بدقسمتی سے مغل دور کے خاتمہ کی وجہ سے اسکی محض 10 فیصد تصاویر بچ پائی ہیں۔ مغل اعظم کی سرپرستی کی وجہ سے یہ داستان عوام میں بھی پسندیدگی کا درجہ اختیار کر گئی اور عوام میں یہ داستان سنائی جانے لگی۔ داستان سنانے والے داستان گوئی میں مناظر کشی کرنے کی پوری کوشش کرتے ۔

انیسویں صدی میں اس داستان نے فارسی سے اردو کا رنگ اختیار کرنا شروع کیا اور یہ داستان دو حصوں میں منقسم ہو گئی۔ ایک حصہ وہ جس میں امیر حمزہ کی پیدائش ، جوانی سے لے کر انکے کوہ قاف میں جا کر " جھوٹے خُدا لقا جِن" کے ساتھ جنگ اور چند دیگر ایڈونچر شامل ہیں۔ اور آخر میں امیر حمزہ شہید ہو جاتے ہیں۔

دوسری داستان کسی خآص ترتیب میں نہ تھی اور اپنی نوعیت میں ایک پیچیدہ داستان تھی۔اس میں نہ صرف امیر حمزہ کے کارنامے بیان کیے گئے بلکہ اس میں امیر حمزہ کی اولاد اور اولاد کی اولاد بھی دکھائی گئی۔اور اس میں امیر حمزہ کی شہادت کا واقعہ موخر کر دیا گیا۔داستان گوئیوں نے ہر داستان میں اس میں کوئی نا کوئی نیا واقعہ کا اضافہ کیا جس کی وجہ سے یہ داستان انتہائی طوالت اختیار کرتی گئی۔

اسی اثنا میں لکھنو کے داستان نویسوں کا ایک گروہ امیر حمزہ کے بار بار دوہرائے جانے والے کارناموں سے بیزار ہو گیا کہ جن میں بار بار کسی نہ کسی دیو جن پری وغیرہ کا تذکرہ ہی ہوتا تھا۔ یہ تمام عناصر عرب اور فارسی تمدن سے مستعار لیے گئے تھے۔ چناچہ انہوں نے اس میں مقامی رنگ شامل کرنے کا فیصلہ کیا یعنی "طلسم"۔ یہاں سے یہ داستان ایک نیا موڑ لینے لگتی ہے۔یہاں سے "داستان امیر حمزہ" ۔ ۔ ۔ "طلسم ہوش رُبا" میں تبدیل ہوتی ہے۔

لیکن تبدیل کرنے والے جانتے تھے کہ یہ تبدیلی "اصل کشتی" کو تباہ کیے بغیر لانی ہے ورنہ "طلسم ہوش رُبا" امیر حمزہ کے بغیر مقبولیت حاصل نہ کر پائے گی۔کیونکہ مقامی مسلمان اپنے روحانی کرداروں سے دلی عقیدت رکھتے ہیں اور وہ سمجھتے ہیں کہ اصل میں وہی ہیرو ہیں باقی کوئی کچھ نہیں کر سکتا۔

تبدیلی کی خواہش رکھنے والے اس گروہ کا سربراہ "میر احمد علی" کو کہا جاتا ہے۔"میر احمد علی" عوام کی نفسیات اور داستان نویسی کے فن سے بخوبی آشنا تھا ۔اُس نے عوام کے مزاج کو سامنے رکھتے ہوئے پرانی "داستان امیر حمزہ" کو استعمال کرتے ہوئے ایک ایسا "طلسم" ایجاد کیا جو دو صدیوں تک لوگوں کے دماغ پر چھایا رہا۔ وہ امیر حمزہ کے کردار سے بور ہو چُکا تھا۔ اب وہ کُچھ نیا چاہتا تھا۔ چناچہ اُس نے پرانی داستان "کہ جس میں طلسم کا ایک معمولی عنصر ہوتا تھا" کو استعمال کرتے ہوئے اس معمولی عنصر کو بہت بڑے عنصر میں تبدیل کر دیا۔ اُس نے ایک طلسمی سلطنت قائم کر دی۔ ایک ایسی سلطنت جس کا سربراہ افراسیاب ایک بہت بڑا جادو گر تھا ۔ ایک ایسی سلطنت جس کی سرحدوں کی حفاظت جادوگر کرتے تھے۔ ایک سلطنت جس کی سرحدوں پر آسمان کو چُھوتی آگ کی ایک دیوار تھی۔ ایک ایسی سلطنت جو امیر حمزہ اور مسلمانوں کے دشمنوں سے بھری پڑی تھی۔ اس سلطنت کے دوسری پار "جھوٹے خدا لقا جن" کی سلطنت کوہ قاف کے پہاڑوں میں قائم تھی۔ امیر حمزہ لقا جن سے جنگ کرنے کے لیے آتے ہیں تو انکو مجبوراً افراسیاب کی سلطنت کی سرحدوں پر موجود آگ کی دیوار کے پار پڑاؤ ڈالنا پڑا۔

اس سیچویشن کو استعمال کرتے ہوئے میر احمد علی نے امیر حمزہ کو "طلسم ہوش رُبا کی داستان" سے باہر کر دیا۔ امیر حمزہ اپنے قیافہ شناسوں کو بُلاتے ہیں تو وہ بتاتے ہیں کہ یہ طلسمی سلطنت امیر حمزہ فتح نہیں کر سکتے بلکہ اس طلسمی سلطنت کی فتح انکے پوتے "شہزادہ اسد" کی قسمت میں لکھی ہوئی ہے جو اپنے چند عیاروں کی مدد سے اس سلطنت کو فتح کرے گا۔
چناچہ امیر حمزہ اپنے پوتے شہزادہ اسد کو ایک فوج عظیم دے کر بھیجتے ہیں جس میں چند عیار بھی شامل ہوتے ہیں۔ ان عیاروں میں ایک عیار "عمرو عیار" بھی ہوتا ہے۔ یہ عیار دُبلا پتلا، مدقوق شخصیت کا مالک ہوتا ہے لیکن ذہن کا رسا۔ جادوئی سلطنت میں داخل ہوتے ہی مسلمانوں کی فوج کو جادو کی وجہ سے شکست ہو جاتی ہے اور محض عمرو ، اسکے چند عیار جن میں اسکا ایک جادوگر دوست "ماررُخ یک چشم" بھی شامل ہوتا ہے وہ افراسیاب کی جادوئی فوج کا مقابلہ کرنے کے لیے دھوکہ، عیاری، ذہانت، اور دیگر صلاحیتوں کو استعمال کرتے ہوئے طلسمی سلطنت میں داخل ہو جاتے ہیں۔

چونکہ سلطنت جادوگروں کی ہوتی ہے اس لیے اس داستان میں فواحش کی بھی جگہ نکل آتی ہے۔ ہر طرف رقص و سرود اور جنسی مناظر نمایاں ہوتے ہیں۔ اس کا اندازہ اس بات سے لگایا جا سکتا ہے کہ افراسیاب شادی شُدہ ہونے کے باوجود حسین لونڈیوں اور خوبصورت لڑکوں میں دلچسپی رکھتا ہے۔ چناچہ اس داستان میں دکھایا جاتا ہے کہ کس طرح عیار جادوگروں کی نفسیات استعمال کرتے ہوئے فتوحات پر فتوحات اختیار کرتے ہیں۔یہی وجہ ہے کہ باوجود اس کے کہ یہ داستان طلسم ہوش رُبا شاید آج سے کوئی ڈیڑھ دو سو سال قبل لکھی گئی ہو گی لیکن اس کے باوجود یہ فحاشی کا نادر مرقع ہے۔

چناچہ یہ کتاب ہر لحاظ سے ایک طلسم ہوش رُبا ہے ۔ یعنی ہوش اُڑا دینے والی۔ یہ کتاب آٹھ جلدوں میں لکھی گئی اور ہر کتاب میں ایک نیا طلسم پار کرنا ہوتا ہے۔ میں نے کافی عرصہ قبل ایک ناکام کوشش کی تھی یہ کتاب پڑھنے کی لیکن نامانوس اردو ہونے کی وجہ سے زیادہ نہیں پڑھ پایا۔