قسمت کا حال یا کال
(سائرہ غفار)
پچھلے دنوں ہماری ایک دوست نے ہمیں فون کرتے ہوئے خوشخبری سنائی”یار آج تو تمہارے ستارے عروج پر ہیں۔آج تمہیں کوئی بڑی کامیابی ملنے والی ہے۔“
ہم نے پوچھا”اچھا!تمہیں کیسے پتہ؟“
موصوفہ چہک کر بولیں”ارے آج کے اخبار میں تمہارے برج میں لکھا ہے۔“
ہم نے کہا”بیکار ہوتا ہے۔“
موصوفی لہک کر بولیں”ارے کبھی کبھی سچ بھی ہو جاتا ہے۔“
ہم نے پوچھا”اور یہ کبھی کبھی کب آتا ہے؟“
فرمانے لگیں”ارے ابھی کچھ دن پہلے ہی میرے برج میں لکھا تھا کہ باہر سے کوئی مہمان آئے گا....“
ہم نے فوراً بات کاٹتے ہوئے ٹکڑا جوڑا”تو آنٹی لوٹ آئی ہوں گی مارکیٹ سے؟‘
وہ بنا برا منائے بولی”ارے نہیں ناں!اسی دن فیاض بھائی امریکہ سے ایک مہینے کے لئے اچانک سے آگئے بنا اطلاع کئے۔“
میں نے کہا”اچھا اور کب کب یہ فالتو باتیں سچ ہوتی ہیں؟“
موصوفہ فرمانے لگیں”ارے ہوتی ہیں ناں،تم بھی ناں پکڑ کر مت بیٹھ جایا کرو۔“
میں نے کہا،”اچھا بھئی چھوڑ دیا،جاﺅ معاف کیا۔“
فوراً چہک کر بولیں،”میری مٹھائی نہ بھولنا۔“
میں نے حیرت سے پوچھا”کون سی مٹھائی؟“
چہکتے ہوئی بولیں،”اسی کامیابی کی جو تمہیں ملنے والی ہے۔“
میں نے غائب دماغ پروفیسر کی طرح کہا،”اوہ اچھا اچھا! ملے گی تو بتاﺅں گی۔“
میں نے فون رکھا اور اخبار اٹھا لیا۔آج پہلی بار دلچسپی سے اپنا برج پڑھا،لکھا تھا”آج آپ کو ایک بڑی کامیابی ملنے کا امکا ن ہے۔شریکِ حیات سے جھگڑا ہونے کا امکان ہے۔70روپے خیرات کر دیں۔“
میں نے فوراً سے اپنی سہیلی کو فون گھمایا،اور پوچھا”یہ برج پڑھا تھا تم نے؟“
وہ چہکیں”جی بلکل۔“
میں نے پوچھا”اب یہ شریکِ حیات کہاں سے لاﺅں جھگڑا کرنے کے لئے؟“
وہ ہنسی”ارے سب تھوڑی ناں سچ ہوتا ہے۔“
میں نے پھر کہا”اور اگر روز کے حساب سے میں 70روپے خیرات کرتی رہی ناں تو میرا خیرات مانگنے کا وقت آجائے گا۔“
ذرا غصے سے بولیں”ارے بھئی رہنے دو تمہیں تو بولنا ہی فضول ہے۔آئندہ نہیں بتاﺅں گی تمہیں تمہارا برج۔“
میں نے فوراً کہا”مل گئی ....“
پوچھا”کیا؟“
میں نے کہا”کامیابی!“
فرمایا،”کہاں؟“
میں بولی،”آپ آئندہ برج نہیں پڑھیں گی ناں ،تو یہ میری کامیابی ہوئی ناں....سچ کہتی ہو کبھی کبھی سچ ہو جاتا ہے ۔اب تو روز پڑھنا پڑے گا۔“
....٭....٭....٭....٭....
سائرہ غفار کافی عرصے سے بچوں اور بڑوں کے لیے لکھ رہی ہیں۔ مزاح کے علاوہ اچھوتے آئیڈیاز پر بھی فی البدہیہ لکھ لیتی ہیں۔بچوں کے رسالے ماہنامہ گوگو سے بہترین قلمکار کا ایوارڈ وصول کرچکی ہے۔

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر