جب میرے ابو کا انتقال ہوا ۔ اس وقت میں اسکول میں پڑھتی تھی ۔ ابو نے اپنے انتقال سے ایک ہفتے پہلے مجھے بلاکر اپنے پاس بٹھایا اور کچھ باتیں کرنے لگے ۔ شائد ابو کو اندازہ ہوگیا تھا کہ وہ اب جانے والے ہیں ۔ جو میرے وہم وگمان میں بھی نہ تھا ۔ ابو نے آخر میں کہا کہ میں اپنے بچوں کو اللہ کے حوالے کر کے جا رہا ہوں ۔ یہ کہتے ہوئے ابو کی آنکھ سے ایک آنسو ٹپک گیا ۔ میں نے اپنی زندگی میں ابو کبھی روتے نہیں دیکھا تھا ۔ میں نے ابو کے گال سے آنسو صاف کیے اور حیران ہوکر ابو کی طرف دیکھا اور کہا ابو آپ رو رہے ہیں ۔ ابو مرد تو نہیں روتے ۔ ابو نے جواب دیا کیوں ،مرد کیوں نہیں روسکتے ۔ کیوں ،مرد انسان نہیں ہوتے ۔ یہ سن کر میں خاموش ہوگئی ۔
ایک ہفتے بعد میرے ابو کا انتقال ہوگیا ۔ ابو کے انتقال کے بعد میں نے اپنی بڑی بہن سے پوچھا کہ ابو ہمیں چھوڑ کر کیوں چلے گئے تو میری بہن نے جواب دیا
ابو کبھی روتے نہیں تھے اور تمام تکالیف اور دکھ اپنے دل میں جمع کرلیتے تھے ۔ اس لیے ان کا دل کمزور ہوگیا اور اس نے چلنا چھوڑ دیا ۔
آخر میں ، صرف اتنا کہوں گی کہ اپنوں کے سامنے رونے سے کوئی نقصان نہیں ہوتا ہے ۔ ہاں آپ
کے نہ رونے سے آپ کے اپنوں کا بہت نقصان ہوجاتا ہے