میری بیوی بڑی سگھڑ اور گھرگرہستن خاتون ہے۔ اس نے مجھے ہلا جلا کر دیکھا اور جب اسے یقین ہو گیا کہ میں فوت ہو گیا ہوں تو اس نے رونے دھونے کی بجائے پہلے گھر میں موجود قیمتی چیزیں ایک کمرے میں محفوظ جگہ پر رکھیں اور کمرے کو باہرسے تالا لگا دیا۔ اس کے بعد اس نے تعزیت کے لئے آنے والوں کے لئے قالین پر چادریں بچھائیں اور پھر اسی طرح کے کچھ دوسرے ضروری کام کرنے کے بعد اس نے رونا دھونا شروع کر دیا اور میرے بیٹوں کو بتایا کہ تمہارا باپ فوت ہو گیا ہے جس پر روتے روتے ان کی حالت غیر ہو گئی۔ اس دوران میں نے اپنے ایک دانشور دوست کو فون کیا اور کہا ”یار میں نے تمہیں اطلاع دینا تھی کہ تھوڑی دیر پہلے میرا انتقال ہو گیا ہے تمہاری بھابی اور بھتیجوں کا رو رو کر بُرا حال ہے تم ذرا میرے گھر آ کر انہیں تسلی دو“ دوست بولا ”یہ تو بہت برا ہوا، تم تو ٹھیک ٹھاک تھے، اچانک کیا ہو گیا؟“میں نے کہا ”پتہ نہیں صبح اٹھ کر نماز پڑھی ہے، کمر سیدھی کرنے کے لئے چارپائی پر لیٹا ہوں، دیکھا کہ عزرائیل  چلے آ رہے ہیں، میں نے گھبرا کر پوچھا کیسے آنا ہوا، بولے تمہاری جان لینے آیا ہوں، میں نے کہا مجھے کچھ ضروری کام ہیں آپ دو چار سال بعد تشریف لے آئیں اتنے عرصے میں، میں اپنے کام نمٹا لوں گا۔ مگر عزرائیل نے کہا میں جہاں بھی جاتا ہوں، ہر شخص یہی کہتا ہے کہ پھر کبھی آ جائیں۔ ابھی دنیا میں بہت سے کام کرنے ہیں حالانکہ بعد میں ان کے بغیر بھی سارے کام ہو جاتے ہیں۔ یہ سن کر میں نے اپنے بیٹے کو آواز دینا چاہی کہ مہمان کے لئے چائے پانی کا انتظام کرو۔ میرا مقصد یہ تھا کہ عزرائیل  کو مصروف کر کے خود ادھر ادھر ہو جاؤں گا مگر اس کے ساتھ ہی میں نے محسوس کیا کہ میرا جسم ساکت ہو گیا ہے، میری بیوی نے آ کر میری آنکھیں بند کیں اور رونا پیٹنا شروع کر دیا۔ کسی نے میرے کانوں میں اور ناک میں روئی بھی ٹھونس دی ہے جس سے مجھے بہت الجھن ہو رہی ہے۔ خیر چھوڑو ان باتوں کو تم بتاؤ کہ کتنی دیر میں میرے گھر پہنچ رہے ہو، مجھ سے اہل خانہ کا رونا پیٹنا برداشت نہیں ہو رہا!
اس پر میرے عزیز دوست نے کہا ”میں نے نماز پڑھنی ہے، پھر وظیفہ کرنا ہے، اس کے بعد قیلولہ کرنا ہے تم اور تمہارے بچے مجھے بہت عزیز ہیں لیکن اس کے لئے عبادت تو نہیں چھوڑی جا سکتی!“ مجھے اپنے دوست کی بات کا بہت دکھ ہوا، مگر میں نے اپنے جذبات پر قابو پاتے ہوئے کہا ”کوئی بات نہیں تم صبح جنازے میں شریک ہو جانا، گیارہ بجے جنازہ کا ٹائم ہے“۔ دوست نے کہا ”یار یہ جنازے کا ٹائم کچھ آگے پیچھے نہیں ہو سکتا، میں ابھی بھابی سے فون پر بات کرتا ہوں“۔ میں نے پوچھا ”کیا گیارہ بجے تمہاری کوئی مصروفیت ہے؟“ دوست نے کہا ”کمشنر صاحب کی پھوپھی صاحبہ انتقال کر گئی ہیں ان کی نمازِ جنازہ بھی گیارہ بجے ہے مگر تم فکر نہ کرو، میں بھابی سے بات کر کے ٹائم ایڈجسٹ کر لوں گا“۔ مجھے دوست کی یہ بات سن کر ایک دفعہ پھر دکھ ہوا میں نے کہا ”ٹائم تبدیل نہیں ہو سکتا، دوسرے شہروں میں مقیم رشتے داروں کو اطلاع دی جا چکی ہے، اخباروں کو خبریں بھی بھیجی جا چکی ہیں، چلو کوئی بات نہیں تم قلوں میں آ جانا“۔ دوست نے پوچھا ”قل کب ہیں؟“ میں نے بتایا ”پرسوں چار بجے سہ پہر ہیں“ دوست نے کہا ”ایک منٹ،میں ذرا اپنی ڈائری دیکھ لوں“ ۔ ڈائری دیکھ کر اس نے کہا ”سوری یار ، پرسوں چار بجے میری ٹی وی ریکارڈنگ ہے تم مجھے بھابی سے بات کرنے دو ، ٹائم کچھ آگے پیچھے کر لیں گے“ مجھے یہ بات سخت ناگوار گزری مگر میں نے کہا ”ٹھیک ہے تم بات کر کے دیکھ لو“۔ بولا ”جب تم نے اپنے انتقال کی خبر سنائی، میں نے اسی وقت ٹیلی فون ڈائری سے تمہارا ٹیلی فون نمبر کاٹ دیا تھا، وہ نمبر مجھے اب یاد نہیں رہا ، کیا نمبر ہے ؟“ میں نے غصے میں فون بند کر دیا!
جب میں نے دوست کو فون کیا میرے ذہن میں یہ تھا کہ میں اسے اپنے بچوں کا خیال رکھنے کے لئے کہوں گا اور اسے بتاؤں گا کہ ساری عمر رزق حلال پر انحصار کرنے کی وجہ سے میری بچت کوئی نہیں ہے۔ لہٰذا اگر میرے بچوں پر کوئی مشکل وقت آئے تو ان کا خیال رکھنا مگر اس کی بے رخی اور دنیا داری دیکھ کر میں نے اس سلسلے میں اس سے کوئی بات نہیں کی۔ میرے انتقال کے کچھ عرصہ بعد ہم دونوں کا ایک مشترکہ دوست بھی انتقال کر گیا ۔ اسے جنت کے قواعد و ضوابط کی خلاف ورزی پر چند روز کے لئے دوزخ میں بھیجا گیا تھا۔ یہ دوست مجھے دوزخ میں دیکھ کر بہت حیران ہوا۔ میں نے کہا ”اس میں حیرانی کی کون سی بات ہے۔ میرے گناہ میری نیکیوں سے زیادہ نکلے اب میں اپنے گناہوں کی فصل کاٹ رہا ہوں“۔
جنت سے ”پیرول“ پر دوزخ آئے ہوئے میرے اس دوست نے بتایا کہ ”تمہارا جگری دوست نیچے دنیا میں تمہاری یاد میں منعقد ہونے والے تعزیتی جلسوں کی صدارتیں کرتا ہے، اور تمہارا ذکر کرتے وقت اس کی آنکھیں ڈبڈبا جاتی ہیں۔ وہ تمہارے بچوں کی مدد کے نام پر اب تک لاکھوں روپے بھی بٹور چکا ہے۔ میرے اس عارضی دوزخی دوست نے اپنی جیب سے اخبار کے ایک کالم کا تراشا بھی نکالا جس پر تصویر میرے دنیا دار دوست کی تھی اور یہ لکھا میری وفات پر گیا تھا۔ اس نے میری تعریف میں زمین آسماں کے قلابے ملا دیئے تھے اور لکھا تھا کہ اپنے دوست کی وفات سے وہ دنیا میں تنہا رہ گیا ہے اور یہ بھی کہ وہ اپنے دوست کے جنازے اور قلوں میں شدت غم کی وجہ سے شریک نہ ہو سکا اس میں ہلنے جلنے کی سکت ہی نہیں رہی تھی۔
میں نے اس تراشے پر ایک نظر ڈالی اور پھر اسے پرزے پرزے کر کے دوزخ کے بھڑکتے ہوئے شعلوں کی نذر کر دیا۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں