کل رات اپنی وائف سے ملاقات کرکے "شمع" نامی کوچ میں واپس آ رہا تھا۔ "گورا قبرستان" کے بس اسٹاپ پر ایک لڑکے نے ہاتھ دے کر وین رُکوائی اور میرے برابر میں آ کر بیٹھ گیا۔ میں نیند کے غلبے کی وجہ سے آنکھیں موندے بیٹھا ہوا تھا۔ اچانک میرے کانوں میں‌کنڈیکٹر کی آواز پڑی،

"تو ہم کیا کرے؟ تم کرایہ دو"

میں نے آنکھیں کھول کر دیکھا تو کنڈیکٹر اُس لڑکے سے جھگڑ رہا تھا۔ پوچھنے پر معلوم ہوا کے دو لڑکوں نے اُس لڑکے سے اُسکا موبائل اور پیسے چھین لیئے ہیں اور اُسے مارا بھی تھا۔ احساس شرمندگی سے اُس بے چارے کے ہاتھ کانپ رہے تھے اور وہ گُنگ سا نظر آ رہا تھا، اُس لڑکے کے ہونٹوں سے خون بھی رس رہا تھا۔

میں نے اپنی جیب میں‌ہاتھ ڈالا اور بہت تھوڑی سی رقم اُس لڑکے کے ہاتھ پر رکھ دی، اُس لڑکے نے ڈبڈبائی سی آنکھوں سے میری جانب دیکھا۔
آپ جانتے ہیں میں نے اُس کی آنکھوں میں‌کیا دیکھا؟

اُس کی آنکھوں میں تشکر اور ممنونیت کا ایک سمندر موجزن تھا!

مجھے ایسا لگا جیسے میرے جسم میں ڈھیروں خون بڑھ گیا ہو۔ ایسی خوشی تو ہزاروں روپے خرچ کرکے بھی حاصل نہیں ہوئی تھی۔