آج سے تقریباً تیس سال پہلے ایک زمین کی قرعہ اندازی ہوئی اس میں جن لوگوں کے نام نکلے ان میں ذیادہ تر لوگ ریٹائرڈ ملازم پیشہ افراد تھے جنھوں نے اپنی جمع پونجی سے اس زمین کی اقساط ادا کیں ، اور جب اس کے الاٹمنٹ آڈر ملے تو معلوم ہوا کہ اس زمین پر کسی کا قبضہ ہوگیا ہے یا اس زمیں کو دوبارہ بیچ دیا گیا ہے ۔ خیر وہ الا ٹمنٹ آڈر ایک ردی کی شکل اختیار کرگیا ۔ لیکن وہ لوگ جنھوں نے اپنی محنت کی کمائی سے اقساط جمع کیں تھیں انھوں نے اس ردی کو بہت حفاظت سے رکھا ۔ انہیں لوگوں میں میری ماں بھی شامل تھیں
تقریباً تیس سال بعد اخبار میں خبر آئی ۔ کہ اس زمین کے اصل حقداروں کو کسی اور جگہ پر زمین الاٹ کی جائے گی ۔ میری امی نے مجھے تمام کاغذات دیے اور کہا کہ جاکر معلوم کرو شائد ہم کو زمین مل جائے۔
میں تمام کاغذات لے کر اخبار پر دیے ہوئے پتے پر پہنچی جو ایک بنگلہ کو آفس کی شکل دیا گیا تھا ۔
وہاں کیا دیکھا کہ
سخت دھوپ میں لوگ جو تمام بوڑھے افراد پر مشتمل ہیں ۔ جن میں مرد اور عورتیں شامل ہیں ، باہر کھڑے ہیں ۔ دروازے پر ایک گن مین کھڑا ہے ۔ اور باری آنے پر ایک ایک کو اندر جانے کی اجازت دی جارہی ہے ۔ باری بھی آدھے آدھے گھنٹے بعد آرہی ہے ۔
میری باری تقریباً چار پانچ گھنٹے بعد آئی اور میرے بعد بھی ابھی کافی لوگ باقی تھے جو تقریباً
ستر ستر سال کے بزرگ تھے ۔ اور ان سب کی ہمت جواب دے چکی تھی ۔
میں اندر گئی تو کیا دیکھا ۔ کہ وہاں کام کرنے والے سب پنکھے میں آرام سے بیٹھے خوش گپیوں میں مصروف ہیں ۔ ہمارے پانچ منٹ کے کام کو آدھا گھنٹہ لگا رہے ہیں ۔
مجھے اگلے ہفتے آنے کی ڈیٹ دی اور کہا کہ اب آپ جائیں
میں باہر گن مین کے پاس آئی اور گارڈ سے کہا کہ آپ راستے سے ہٹے مجھے دروازہ کھولنا ہے تاکہ یہ سب دیکھ سکیں کہ اندر کیا ہورہا ہے ۔
گن مین نے دروازے کے سامنے گن کرتے ہوئے کہا کہ آپ دروازہ نہیں کھول سکتی ہیں
میں نے گارڈ سے کہا کہ آپ کیا کریں گے گولی مار دیں گے مجھے ، تو ماردیں ، لیکن میں دروازہ تو ضرور کھولوں گی
تمام افراد وہاں جمع ہوگئے اور مجھے ایسے دیکھنے لگے جیسے میں دوسری دنیا کی مخلوق ہوں
جب گارڈ کو اندازہ ہوا کہ میں اپنی بات سے نہیں ہلوں گی تو اس نے کہا کہ آپ چیرمین صاحب سے اجازت لے کر آجائیں تو میں دروازہ کھول دوں گا
میں چیرمین کے کمرے میں گئی تو وہاں اے سی چل رہا تھا ۔
میں نے چیرمین سے کہا کہ آپ نے اتنے سارے بزرگ افراد کو باہر گرمی میں کھڑا کیا ہوا ہے ۔ آپ بے شک دس گھنٹے لگائیں لیکن ان سب کو یہاں اے سی میں انتظار کرائیں۔
چیرمیں میں نے کہا میں ابھی چپراسی کو بھیج کر ان سب کو اندر بٹھانے کا انتظام کرتا ہوں
میں نے ان سے کہا آپ چپراسی کو رہنے دیں یہ کام میں خود کرسکتی ہوں ۔
یہ کہہ کر میں باہر آئی چیرمیں صاحب کا پیغام گارڈ کو دیا تو وہ سامنے سے ہٹ گیا اور میں نے دروازہ کھول دیا ۔ سب لوگ اندر جانے لگے اور میں نے باہر کی طرف جانے کے لیے قدم بڑھایا
تو ایک بزرگ میرے قریب آئے اور کہا
شاباش بیٹا
میں ایک ہفتے بعد اپنا نیا الاٹمنٹ آڈر لینے گئی تو کیا دیکھا ۔ دروازے کھلا ہوا ہے، گن مین ایک کونے میں بیٹھا ہوا ہے ۔ اور باہر کو ئی رش نہیں ہے ۔ سب آتے اور بغیر انتظار کیے اندر جاتے اپنا کام کراتے اور چلے جاتے
جب میں واپس جانے لگی تو گارڈ نے مجھے روکا اور کہا
یہ دروازہ اس وقت کے بعد، پھر کسی پر بند نہیں ہوا
آپ کا بہت شکریہ ،
آپ نے مجھے بہت سے لوگوں کی بدعاؤں سے بچالیا ۔