قدرت نے انسان کو صاف و شفاف پانی سے نوازا ہے جو ایک اساسی غذائیت بخش نعمت ہے۔ کوئی بھی انسان کھانا کھائے بغیر ایک مہینے تک تو زندہ رہ سکتا ہے لیکن پانی پیئے بغیر اس کا گزارہ ممکن نہیں کیونکہ اگر ہمارے جسم سے 2 فیصد پانی بھی کم ہو جائے تو ہماری صحت بری طرح متاثر ہوتی ہے لیکن شرط یہ ہے کہ پانی صاف ستھرا اور جراثیم سے پاک ہو۔ ہمارے ہاں پانی کی فراہمی اور اس کی صفائی دونوں ہی صحت کے اہم مسائل ہیں جن کے حل کیلئے حکومتی اقدامات اور لوگوں میں صفائی کا شعور بیدار کرنے کی کوششیں اوّل تو کی ہی نہیں جاتیں اور اگر ایسا ہو جائے تو اس سے صرف ایک خاص طبقہ ہی مستفید ہو پاتا ہے لیکن ہمارے تمام معزز قارئین کی سہولت کیلئے اور پانی جیسی نعمت کے وسیع استعمال کو ممکن بنانے کیلئے اور صحت کے شعور و آگہی کو اجاگر کرنے کیلئے اس مضمون کے تحت پانی کی صفائی کے مختلف طریقے منظر عام پر لائے جا رہے ہیں تاکہ آپ صاف پانی حاصل کر کے صحت مند زندگی گزار سکیں۔
اُبالنا
پانی کو اُبالنے سے تمام جراثیم اور بیکٹیریا ہلاک ہو جاتے ہیں لیکن اسے ابالنے کیلئے صاف برتن کا ہونا ضروری ہے۔ ماہرین صحت کے مطابق پانی کو کم از کم 3 منٹ اور زیادہ سے زیادہ 20 منٹ تک اُبالیں تو یہ وائرس، کیڑوں اور بیکٹیریا، جراثیم سے پاک ہو جاتا ہے۔
سات دن اور جراثیم ہلاک
ماحولیات کے ماہرین کے مطابق سات دن تک ذخیرہ شدہ پانی میں جراثیم مکمل طور پر ہلاک ہو جاتے ہیں لیکن اس پانی میں تازگی نہیں رہتی ۔عالمی ادارہ صحت کی سفارش کے مطابق طویل عرصے تک پانی ذحیرہ کرنے سے اس کے معیار میں کمی نہیں ہوتی۔
لیموں سے صفائی
عموماً لیموں کا استعمال سکنجبین کے طور پر ہی کیا جاتا ہے لیکن پانی صاف کرنے کیلئے بھی اسے استعمال کیا جا سکتا ہے ۔ایک لیٹر پانی میں ایک چمچ لیموں کا رس شامل کرنے سے یہ پانی 15 منٹ بعد بالکل صاف اور جراثیم سے پاک ہو جائیگا۔
کلورین سے صفائی
دنیا بھر میں کلورین پائوڈر اور کلورین گولیاں پانی کی صفائی کیلئے استعمال ہو رہی ہیں ۔کلورین پانی میں موجود جراثیم ہلاک کرنے میں موثر کردار ادا کرتا ہے۔
پھٹکری
پھٹکری کی اہم خوبی یہ ہے کہ اس سے مٹی ملا گدلا پانی فوری صاف ہو جاتا ہے لیکن اس سے کم جراثیم ہلاک ہوتے ہیں پھٹکری کے ایک ٹکڑے کو کپڑے میں باندھ کر اسے پانی میں دو یا تین مرتبہ ڈبوئیں تقریباً ڈیڑھ گھنٹے بعد یہ پانی صاف ہو جائیگا۔
ہائیڈروجن پرآکسائیڈ
یہ بھی جراثیم کش خصوصیات کا حامل ہے۔ خاص طور پر اس کی بدولت خطرناک بیکٹیریا ایکولی اور کالرا فوری ہلاک ہو جاتے ہیں۔ ایک لٹر پانی میں صرف دو بوند ہائیڈروجن پرآکسائیڈ شامل کرنے سے یہ جراثیم سے پاک ہو جائیگا اور پانی کا ذائقہ بھی خراب نہیں ہوتا۔
بلیچنگ پائوڈر
تقریباً 600 ملی لیٹر پانی میں ایک چائے کا چمچ بلیچنگ پائوڈر ڈالنے کے بعد اسے 30 منٹ تک چھوڑ دیں تو تمام جراثیم ہلاک ہو جائیں گے اور پانی جراثیم سے پاک ہو جائیگا۔
دھوپ سے صفائی
سورج کی الٹرا وائلٹ شعاعیں بھی پانی کی صفائی کا ذریعہ بنتی ہیں۔ ایک کھلے برتن یا مٹکے میں پانی بھر کر اسے کالے رنگ کے کپڑے سے ڈھانپ دیں اور صبح 10 بجے سے سہ پہر 4 بجے تک صحن یا چھت پر رکھیں۔ دھوپ کی تمازت سے پانی کے نقصان دہ جراثیم ہلاک ہو جائیں گے اور یہ پانی اْبلے ہوئے پانی کی طرح محفوظ ہو گا۔ ٭