گاجر کو ہر طرح کی غذائی ضرورت کے مطابق استعمال کیا جاسکتا ہے۔ اس کا جوس ''کرشماتی مشروب'' کہلاتا ہے تو اس کا مربہ ایک قوت بخش روح افزاء میٹھا اور سرخوشی مہیا کرتا ہے۔ گاجر میں کھاری اجزاء بکثرت ہوتے ہیں۔ جن سے خون صاف اور توانا ہوتا ہے۔ تیزابیت آج کے دور کی اذیت ناک بیماری ہے۔ گاجر کھانے سے معدے سے تیزابی مادے خارج ہو جاتے ہیں۔گاجر مقوی اور مصفی غذا ہے۔ اسے وٹامنز کا خزانہ بھی کہا جاتا ہے لیکن وٹامن اے اس میں بکثرت پایا جاتا ہے۔ اس کے کیمیائی اجزاء بدن انسانی اور اعضائے جگر کے لئے بے حد کارآمد ہیں۔ گاجر کو انگریزی میں کیرٹ Carrotکہا جاتا ہے یہ کیروٹین نامی مادہ وٹامن اے کی ابتدائی شکل ہوتا ہے۔یہی کیروٹین جب جگر میں جاتا ہے تو وٹامن اے بن جاتا ہے۔ انسانی صحت کے لئے وٹامن اے ناگزیر ضرورت ہیں۔ اس وٹامن کی وجہ سے بینائی بہتر ہوتی ہے اور یہ بصارت کو قائم و دائم رکھنے کے لئے بھی ضروری وٹامن ہے۔ اس کی کمی کے باعث شب کوری اور نظر کی کمزوری' بدن میں انفیکشن' بار بار نزلہ زکام' بھوک میں کمی' مسوڑھوں' دانتوں اور جلدی بیماریاں' ناک' کان' گلا' آنتوں میں سوزش گردوںاور رحم کے بیرونی حصے کی لعاب دار جھلیاں بری طرح متاثر ہوتی ہیں۔ بچوں کی اچھی صحت کے لئے وٹامن اے نہایت ضروری ہے۔ اس کی کمی کے باعث بچوں کی نشوونما رک جاتی ہے۔ وٹامن اے عموماً حیوانی غذائوں مثلاً انڈے کی زردی' بھیٹر بکری کی کلیجی' دودھ' مکھن اور گھی وغیرہ سے حاصل ہوتا ہے۔ البتہ سبز پتوں والی سبزیوں میں بھی یہ وٹامن قدرتی طور پر موجود ہے اور گاجر ان میں سے ایک ہے۔ گاجر طاقت بخش غذا ہے۔ اس سے قلب و ذہن کو تقویت ملتی اور جگر کی کارکردگی میں اضافہ ہوتا ہے۔ دائمی قبض' خرابی خون' پیشاب کی بندش' مرض نسیان' اختلاج قلب رفع ہوتا ہے۔ گاجر مسوڑھوں کو مضبوط اور دانتوں کو شفاف کرتی ہے۔