بھائیو اور بہنو ۔ ۔ ۔ چونکہ اب میں بھی ذیلی ناظم بنا دیا گیا ہوں اس لیے میرا فرض بنتا ہے کہ بڑی بڑی باتیں کرُوں۔ ورنہ مجھے کوئی ناظم نہیں سمجھے گا۔تاہم میں کوشش کروں گا کہ بڑی بڑی باتیں ہلکے پُھلکے انداز میں کروں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔

جنہوں نے کسی بھی فورم پر کُچھ وقت بِتایا ہوتا ہے وہ بخوبی جانتے ہیں کہ کسی بھی فورم پر ماڈریٹر یا ایڈمنسٹریٹر کس قدر اہمیت کے حامل ہوتے ہیں۔ انکے رنگ جُدا، انکے ڈھنگ جُدا، جب چاہتے ہیں کسی کی پوسٹ میں چھیڑ خانی کر لیتے ہیں، اور تو اور کسی سے ناراضگی ہو جائے تو اُن صاحب کا داخلہ بھی بند کر دیتے ہیں۔ عُرف عام میں ماڈریٹرز کو کسی بھی فورم کا پرویز مشرف کہا جا سکتا ہے۔ تاہم میں آپ کو یہ بھی بتاتا چلوں کہ اس قسم کی فہرست میں پاکنیٹ کے موڈریٹز شامل نہیں۔ پاک نیٹ کے ماڈریٹرز بیچارے مرنجاں مرنج قسم کے، ممبرز کی تلخ تُرش بات سُننے پر مجبور ، ہر مراسلے کے جواب میں ٹھنڈی آہ بھرنے والے کہ کاش میں ناظم نہ ہوتا تو کیا ہوتا۔ الغرض پاکنیٹ کے موڈریٹز دنیا کی الگ ہی مخلوق ہیں۔ تاہم پھر بھی ۔ ۔ ۔ ہیں تو ماڈریٹرز نا۔

تو اس مراسلہ میں ۔ ۔ ۔میری کوشش ہو گی کہ میں اُن چند خوبیوں یا نقاط کو بیان کر سکوں جن کی بنیاد پر مجھے ۔ ۔ ۔ ۔ ۔اررررررر۔۔۔۔میرا مطلب ہے کسی کو فورم کا ماڈریٹر چُنا جا سکتا ہے یا وہ ماڈریٹر بننے کی درخؤاست دے سکتا ہے۔یہ خوبیاں یا نقاط ناقابل تنسیخ ہیں۔ آپ اس فورم کو چھوڑ کر کسی بھی فورم میں چلے جائیں، انہی سے ملتی جُلتی خوبیوں سے مزین ماڈریٹرز آپ کو نظر آئیں گے۔


پسندیدہ عوامل:

مخلص اور ایماندار:
صرف کسی فورم پر نہیں بلکہ دنیا کی کسی بھی فیلڈ میں کامیاب ہونے کے لیے یہ بنیادی شرط ہے۔ محنت سے بھی قبل ۔اگر آپ مخلص نہیں، اگر آپ ایماندار نہیں تو آپ کی کامیابی کبھی بھی لمبے عرصے کے لیے نہیں ہو گی۔ فورم کے ساتھ مخلص ہونے سے مراد یہ ہے کہ آپ فورم کو محض شغل میلے کی جگہ نہ سمجھیں۔ بلکہ ادھر کُچھ سیکھنے اور سکھانے کی نیت سے آئیں۔ادھر اپنی رائے کا اظہار کھل کر کریں۔ اگر فورم کو کبھی آپکی ضرورت ہو اور آپ کے پاس وقت ہو تو بہانہ نا بنائیں۔ آپ کے مراسلے ، آپ کی تحریر ، آپکی تحریر کے الفاظ چیخ چیخ کر آپکی شخصیت کے بارے میں بیان کرتے ہیں۔ اس لیے جب بھی لکھنے لگیں خوب سوچ سمجھ کر لکھیں۔ خیر اب ایسا بھی نہ کیجیے گا کہ محض سوچتے ہی رہ جائیں اور اتنی دیر میں بیس ، پچیس پوسٹس اور ہو جائیں۔

مراسلات کے جوابات:
مراسلات کا تجزیہ ٹھنڈے دل سے اور اپنے نظریات کے مطابق نہ کیجیے۔بلکہ غیر جانبدارانہ انداز اپنائیے۔ آپ کے مراسلات سے ہر گز ایسا ظاہر نہ ہو کہ خواہ کُچھ بھی ہو جائے آپ کسی ایک نظریہ کی ہی حمایت جاری رکھیں گے خواہ وہ کتنا ہی غلط ثابت کیوں نہ ہو چُکا ہو۔ اگر کسی بات کا علم نا ہو تو اپنی بات پر اڑ مت جائیے ۔

ریگولر:
ایک تو انگلش کے چند الفاظ ایسے ہیں جنکا اب ترجمہ بھی معلوم نہیں۔ چناچہ فورم پر ریگولر رہنے کی کوشش کیجیے۔ کوشش کیجیے کہ روزانہ فورم پر آئیں۔ اگر روزانہ ممکن نہیں تو اپنے دورے جلد سے جلد کرنے کی کوشش کریں۔ تاکہ انتظامیہ کی نگاہوں میں رہیں۔"کسی کی نظروں میں رہنا بہت اہم کام ہے"۔ ایسے نا ہو کہ آپ کی یادوں پر وقت کی گرد بیٹھ جایا کرے۔انتظامیہ کئی ضروری وجوہات کی بنا پر ریگولر ممبرز کو زیادہ پسند کرتی ہے۔

فورم کے اصُول:
فورم کے جو بھی اصُول ہوں انکی پابندی کی کوشش کیجیے۔ ایسا نہ ہو کہ آپ انکی خلاف ورزی کرتے ہوئے پکڑے جائیں اور معتوب ٹھہریں۔ ہو سکتا ہے کہ انتظامیہ آپ پر پابندی نا لگائے لیکن ماڈریٹر شپ کی فہرست میں سے آپکا نام نکل جاتا ہے۔

میچورٹی:
چونکہ ماڈریٹر شپ ایک ذمہ داری کا کام ہے۔ اور بنیادی طور پر ایک ماڈریٹر فورم کے چلنے یا "بیٹھ" جانے کا سبب بھی بن سکتا ہے۔ اس لیے انتظامیہ کوشش کرتی ہے کہ ذہنی طور پر میچور ممبر کو انتظامیہ میں لے۔میچورٹی کی تعریف کرنا مشکل کام ہے۔ لیکن میچورٹی سے مراد لے لیں اچھی خصؤصیات کا حامل۔

علم:
کوشش کیجیے کہ آپ فورم پر سیکھنے کی نیت سے آیا کریں۔ کبھی بھی اپنے علم کو حرف آخر نہ سمجھا کریں۔اس طرح علم مین اضافہ ہوتا ہے۔علم سے مراد ڈگری نہیں بلکہ علم سے مراد کسی ٹاپک پر اچھی معلومات ہے۔ اس طرح ممبر کی عزت میں اضافہ ہوتا ہے۔ محض ہنسی مذاق والی پوسٹنگ کبھی بھی آپکی عزت میں اضافہ نہیں کروائیں گی۔

نئے موضوعات:
فورم کی انتظامیہ ایسے ممبر کو پسند کرتی ہے جو اکثر و بیشتر موضوعات کا آغاز کرتا رہے۔ یاد رکھیے موضوعات اور شاندار موضوعات کسی بھی فورم کی جان ہوتے ہیں۔ اور اگر آپ یہ "جان بننا" چاہتے ہیں تو مراسلات کے ساتھ ساتھ موضوعات شروع کرنے پر خصوصی توجہ دیجیے۔ کئی ممبرز اس کو اہمیت نہیں دیتے۔لیکن یہ بہت اہم عنصر ہے۔

PRO-ACTIVE:
پرو ایکٹو کی تعریف کرنا بھی بہت مشکل امر ہے۔ یوں سمجھ لیں کہ اپنی ذمہ داری سمجھنے والا، قدم اُٹھانے والا، دوست شخصیت۔ تو پرو ایکٹو رہیے۔ پرو ایکٹو لوگ ہر جگہ کامیاب ہوتے ہیں۔


نا پسندیدہ عوامل:
مراسلات کی دوڑ:Spamming
رپلائی یا مراسلات کا جواب ایک بہت اہم عنصر ہے جس کو اکثر ممبرز نظر انداز کر جاتے ہیں۔ وہ سمجھتے ہیں کہ زیادہ سے زیادہ مراسلات کی دوڑ ہی اصل میں فورم میں وجہ پسندیدگی ہوتی ہے۔ اس مقصد کے لیے وہ ہر مراسلے کے جواب میں محض شکریہ، تھینکس، کرم، نوازش، گریٹ وغیرہ جیسے مختصر فقرے لکھ کر چلے جاتے ہیں۔ اس طرح چند مہینوں میں ان کے مراسلہ جات کی تعداد ہزاروں میں پہنچ جاتی ہے۔ اور کوئی شک نہیں کہ وہ پاپولر بھی ہو جاتے ہیں لیکن فورم کی انتظامیہ انکو دیکھنے کے ساتھ ساتھ پرکھ رہی ہوتی ہے۔یہی وجہ ہے کہ فورم پر مراسلات کی دوڑ میں حصہ لینے والے عموماً انتظامیہ کی نظروں میں اتنے پسندیدہ نہیں ہوتے اور انتظامیہ انکو کبھی بھی ماڈریٹر شپ کے لیے خوشی سے قبول نہیں کرتی۔

رویہ:
فورم پر اپنا رویہ معتدل رکھیے۔ طنزیہ گفتگو، حد سے زیادہ ہنسی مذاق، spammingوغیرہ کبھی بھی اپکو ترقی کی راہ پر گامزن نہیں کریں گی۔