میں آج سید ابوالاعلیٰ مودودی کی کتاب تعلیمات پڑھ رہا تھا جو شاید 1930-1940 کے عرصہ میں لکھے گئے آرٹیکلز پر مشتمل ہے۔ اس کتاب کا خلاصہ کچھ یہ ہے کہ مذہبی اداروں کا تعلیمی نظام نہ صرف فرسودہ بلکہ ملت اسلامیہ کے لیے انتہائی تباہ کن ہے۔ ۔ ۔ لیکن اس کے ساتھ ساتھ جدید تعلیم کا نظام بھی اپنی تمام تر حشر سامانیوں کے ساتھ اصل روح اسلامی کے خاتمہ کے لیے سر بکفن ہے۔ جدید تعلیمی نظام مسلمان بنانے کے بجائے مسلمان کو اسلام سے دور کر رہا ہے اس لییے مدارس کے سسٹم کو بدلنے کے ساتھ ساتھ جدید تعلیم کے سسٹم کو بھی اسلامی روح کے مطابق کرنا چاہیے۔ ان کا کہنا تھا کہ جدید نظام تعلیم میں پڑھائے جانے والے تمام تر مضامین ایسے ہیں جو مسلمان کو اسلام سے تشکیک میں ڈالتے ہیں، ذہنی طور پر غلام بناتے ہیں اور مسلمان سے اصل اسلامی روح ختم ہو جاتی ہے۔ وہ جدید تعلیمی درس گاہوں کو "جدید مقتل گاہ" قرار دیتے ہیں۔ اور کہتے ہیں کہ محض اسلامیات لازمی کا پھندنا لگانے سے مسئلہ حل نہیں ہو گا۔

میں سید مودودی صاحب کی تحریروں کی کاٹ اور جان کا معترف ہونے کے باوجود اور بار بار سوچنے کے باوجود، جدید تعلیم کے بارے میں انکی رائے سے متفق نہیں ہو پا رہا۔۔
مین یہ سمجھتا ہوں کہ فزکس، کیمسٹری، بائیو یا دیگر مضامین ہماری اسلامی سوچ پر کوئی اثر نہیں ڈالتے اور نہ ہی ان کے پڑھنے اور پر پر غور و فکر کرنے سے کسی قسم کے ملحدانہ خیالات و نظریات جنم لیتے ہیں۔
میری رائے یہ ہے کہ کتابیں نہیں بلکہ جدید درس گاہوں میں دستیاب ملحدانہ ماحول اور مخلوط تعلیمی نظام اس کا سبب ہو سکتا ہے۔
تاہم یہ سوال از خود اپنی جگہ اہمیت رکھتا ہے کہ آخر جدید تعلیم گاہوں میں ایسا ماحول کیوں پیدا ہو رہا ہے۔

سید مودودی سے اختلاف کا میرا موقف اس وقت بھی کمزور پڑتا محسوس ہتا ہے جب مجھے حضرت اقبال کا وہ شعر یاد آتا ہے کہ
"ہم تو سمجھتے تھے کہ لائے گی فراغت تعلیم
کسی خبر تھی کہ چلا آئے گا الحاد بھی ساتھ"

کیا آپ بتا سکتے ہیں کہ کتابوں کا انسانی سوچ پر کیا اثر پڑتا ہے اور وہ بھی اس صورت میں کہ ہم ان کتابوںکو محض رٹا لگاتے ہیں۔