وہ ایک سفید ریش بزرگ آدمی تھے جن کا مثل اس کے بعد میں نے نہیں دیکھا۔ انتہاء درجے کے سچے اور انتہاء درجے کے دیانتدار۔ دو دہائیاں قبل سیمنٹ کی قلت انتہاء کو پہنچ گئی تھی۔ کسی حکومتی ادارے نے نہ جانے کیسے سیمنٹ کی تقسیم کی ذمے داری ان کے حوالے کر دی۔ انہی دنوں ان کی بیٹی کا مکان بن رہا تھا۔ داماد اور بیٹی کے بھرپور اصرار کے باوجود وہ انہیں دو بوری سے زیادہ سیمنٹ دینے پر آمادہ نہ ہوئے کیونکہ ان کا حصہ اتنا ہی بنتا تھا۔ ان کے بدترین مخالفین کو بھی کبھی یہ جرات نہ ہوئی تھی کہ ان کی کسی بات کو جھوٹا کہیں۔
اللہ کی طرف سے آزمائش ہوئی۔ حاسدین نے سرکار کے کچھ کارندوں کے ساتھ ساز باز کر کے ان کے مکان کا ایک حصہ یہ کہہ کر گرا دیا کہ انہوں نے وہ سرکاری زمین پر تعمیر کر رکھا تھا اور یہ کہ اپنے گھر کے ساتھ گزرنے والی گلی کا اچھا خاصا رقبہ انہوں نے اپنے مکان میں شامل کر لیا تھا۔ اللہ کے اس بندے نے عدالت کا دروازہ کھٹکھٹایا۔ ساٹھ کی دہائی تھی۔ دس ہزار روپے ہرجانے کا دعوٰی کیا۔ ایک سال گزرا، دو سال گزرے، پانچ، دس،پندرہ، بیس سال بیت گئے۔ کوئی فیصلہ نہ ہو سکا۔ پنجاب کا صوبائی چیف جسٹس ان کا شاگرد تھا، ایک دفعہ اپنے استاد محترم سے ملا تو ان کی عزت افزائی کے لیے کرسی چھوڑ کر برابر میں آ کر بیٹھ گیا لیکن اس مردِ درویش نے رشتے داروں کے اصرار کے باوجود اپنے مقدمے کی سفارش کے لیے ایک لفظ تک منہ سے نہ نکالا۔ پچیس سال گزرے پھر تیس سال گزر گئے۔
دنیا کی عدالت نے کوئی فیصلہ نہ دیا لیکن اللہ کی عدالت کام کرتی رہی۔ مکان گرانے والوں کا نام و نشان تک مٹ گیا۔ آج اس علاقے میں کوئی انہیں جانتا بھی نہیں۔ تیس سال بعد مقدمے کی پیروی کرنے والا حکومتی وکیل فوت ہو گیا۔ اس کے جانشین بیٹے نے جب اس مقدمے کی فائل کا اپنے طور پر مطالعہ کیا تو دوڑا دوڑا اس مردِ آہن کے گھر چلا گیا اور پکار اٹھا کہ "آپ پر جھوٹا مقدمہ بنایا گیا، میں اس کی پیروی ہرگز نہیں کروں گا"۔ اگلی پیشی پر اس نے جج کو بتایا کہ "جج صاحب یہ مقدمہ آپ کی عدالت اور آپ کی سرکاری رہائش سے محض آدھ کلو میٹر فاصلہ کی زمین کا ہے۔ آپ وہاں چل کر دیکھ لیجیے کہ سب مکان ایک سیدھ میں بنے ہیں اور کسی نے سرکاری زمین یا گلی پر قبضہ نہیں کیا"۔ چند دن بعد جج صاحب آئے۔ ایک دو آدمیوں نے فیتے سے پیمائشیں لیں۔ آس پاس کے گھروں سے زمین کے کاغذات کی کاپیاں حاصل کیں اور تیس منٹ میں وہ مقدمہ ختم ہو گیا جس کے فیصلے کا انتظار تیس سال سے کیا جا رہا تھا۔
لوگ اس مردِ درویش کے پاس آئے اور بولے "آپ رشوت دے دیتے یا سفارش کرا لیتے تو یہ معاملہ کب کا ختم ہو چکا ہوتا اور آپ اپنی بوڑھی ہڈیوں کے ساتھ عدالتوں کی پیشیاں بھگتنے سے بچ جاتے"۔ ان کے چہرے پر معصوم سی مسکراہٹ آئی اور گویا ہوئے "تو پھر ان میں اور مجھ میں کیا فرق باقی رہ جاتا"؟
آخری پیشی میں عدالت نے مقدمہ خارج کرتے ہوئے ریمارکس لکھے کہ اگر مدعی دس ہزار روپیہ ہرجانہ لینا چاہتا ہے تو اسے ہدایت کی جاتی ہے کہ اس کے لیے ہماری عدالت میں‌ ایک دوسری درخواست داخل کرے۔پہاڑوں جیسا حوصلہ رکھنے والا اسی سالہ بزرگ تڑپ اٹھا اور بولا "نہیں، نہیں، میرے لیے اتنا ہی کافی ہے کہ میرے ضمیر پر کوئی بوچھ نہیں رہا اور دنیا کو بھی پتہ چل گیا کہ مجھ پر جھوٹا الزام لگایا گیا تھا۔ رہ گیا ہرجانے کا معاملہ تو میں آپ کے دوسرے فیصلے کا انتظار کرنے کے لیے شاید مزید تیس سال زندہ نہ رہ سکوں"۔
یہ ہمارے محلے کا واقعہ ہے اور ہمارے عدالتی نظام کی ایک جھلک ہے۔