آپ جو بھی ہوں ،ہم پہلے ہی کہہ چکے ہیں کہ یہ مضمون نہ پڑھئے اس لئے کہ اس سے آپ کو کچھ بھی حاصل نہ ہوگا ۔یہ بالکل فالتو قسم کی تحریر ہے۔ارے ارے ۔۔۔آپ آگے بڑھتے ہی چلے جارہے ہیں ۔۔۔۔۔،ہمارے منع کرنے کے باوجود پڑھتے ہی جارہے ہیں ۔بھئی!آپ کو پڑھنا ہی ہے تو اس میگزین میں ڈھیر سارے مضامین ہیں ۔شہر بھر میں درجنوں لائبریریاں ہیں ۔ کتابیں یا اخبار خرید نا نہیں چاہتے تو کسی سے کچھ بھی مانگ کر پڑھ سکتے ہیں ،حالانکہ یہ اچّھی عادت نہیں ہے(پڑھنا نہیں ،مانگ کر پڑھنا )،پڑھنے کے لئے تو دنیا میں بہت سی چیزیں ہیں۔ سائن بورڈ ہیں ،گھروں پر لگی ہوئی نیم پلیٹیں ہیں اور کچھ نہیں تو لوگوں کے چہرے ہیں ۔ایں! مگر یہ کیا باوجود ہمارے بار بار سمجھانے کے آپ نے پڑھنا بند نہیں کیا ؟ آپ سمجھتے کیوں نہیں ،عجیب ڈھیٹ قسم کے ہیں آپ !
اسکول میں ٹیچر پڑھنے کے کے لئے کہتے ہیں ،تب نہیں پڑھتے ،والدین کہتے ہیں ان کی نہیں سنتے ،اردو کے خیر خواہ اور ادیب و شاعر کہتے ہیں کہ اردو زبان مٹتی جا رہی ہے ۔اے اردو والو! اردو پڑھو ، اپنے بچّو کو انگریزی اسکولوں میں مت ڈالو ، اور انگریزی پڑھا ہی رہے ہو تو خیر کوئی بات نہیں اردو بیچاری آپ کی ترقّی میں کب رکاوٹ بنی ہے ،جو اب بنے گی ۔مگر اس غریب کابھی کچھ حق ہے، اسے بھی سیکھو اور پڑھو ،مگر آ پ پھر بھی اردو نہیں پڑھتے اور یہاں ہم بار بار کہ رہے ہیں کہ مت پڑھو تو کان پر جوں تک نہیں رینگتی ۔لگتا ہے آ پ ویسے ماننے والے نہیں،آپ کا کچھ علاج کرنا ہی پڑے گا ۔ لیجئے !میں لکھنا ہی بند کر دیتی ہوں ۔کیا پڑھیں گے آپ ؟ ویسے بھی آپ کو اتنا پڑھ کر ملا کیا ؟میں نے توپہلے ہی بتا دیاتھا ناکہ یہ ایک فالتو تحریر ہے ،کچھ بھی حاصل نہیں ہوگا ۔ مگر آپ سنتے کہاں ہیں۔۔۔ اچّھا۔ خدا حافظ

سمیّہ خاتون