یعنیٰ گویا اب ایک بار پھر ؟ حب الوطنی کے نام پر ؟پاکستان کی سلامتی کے نام پر ؟ مطلب آپ یہی چاہتے ہیں ناں کہ پوری قوم ساری سیاسی و دینی جماعتیں صحافی دانشور سب پھر آپ کی لائن ٹو(Tow) کرنے لگیں اس لیے کہ آپ کو ان دنوں”حب الوطنی“ کی ضرورت ہے؟۔

مطلب آپ کیا سمجھتے ہیں سب” ٹشو پیپرز“ ہیں؟جو جب اور جیسے آپ چاہیں آپ کے کام آجائیں ؟آپ کو پسینہ آئے(امریکا کے خوف کا ) تو یہ آپ کے ماتھے کو صاف کریں آپ کو ناک پونچھنے کی ضرورت پڑے(ریمنڈ ڈیوس) تو یہ دستیاب ہوجائیں گویا آپ قوم کی خدمت کےلیے نہ ہوئے قوم آپ کی خدمت کے لیے ہوئی ناں؟مجھے معلوم ہےان چند سطروں کی کوئی اوقات نہیں پورا میڈیا اور سیاسی قیادت ایک بار پھر بغیر سوچے اور بغیر آپ سے آپ کے ماضی کے حسابات پوچھے آپ کی اسی نئی ڈگڈی پر رقص کےلیے تیار رہے اور ہر بار کی طرح اس بار بھی آپ نعرہ بھی ”اصلی تے وڈا “والا لے کر آئے ہیں” پاکستان کی سلامتی کو خطرہ ہے“ آپ نے امریکا مخالف جذبات کواستعمال شروع کردیا ہے اور تو اور کراچی میں امریکی قونصل خانے پر مظاہرہ اور جھنڈا بھی جلایا گیا وہ قونصل خانہ جس کی حفاظت آپ پچھلی کئی دہائیوں سے اپنا خون جگر دے کر کررہے تھے ۔

ابھی کچھ اور باد ل گرجنے اور برسنے ہیں، ابھی تو حامد میر ،انصار عباسی سمیت آپ کے سارے” میڈیا کمانڈوز“ میدان میں اتریں گے ابھی تو وہ ہا ہا کار مچے گی کہ خدا کی پناہ گرد کے طوفان کھڑے کرنا تو آپ کے بائیں ہاتھ کا کھیل ہے اس فن میں تو آپ استاد ہیں سارے سیاسی و مذہبی حامی و مخالف عناصر اپنی اپنی سیاسی لنگوٹ کس کر آپ کی پشت پر ہوں گے۔

نتیجہ جو بھی نکلے کوئی یہ تو پوچھنے سے رہا کہ حضرت یہ امریکا یہاں آیا کب اور کیسے تھا؟کس نے اس کی مدد کی تھی؟کس نے ڈالر لے کر بندے بیچے تھے کس نے قو م”فروختہ وچہ ارزاں فروختنہ “کا معاملہ تھا؟ کس نے اپنے بھائیوں کی عزتیں نیلام کیں تھیں ؟کون پوچھے گا آپ سے؟جس کو ہو اپنےجان و دل عزیز وہ آپ کی گلی میں جائے کیوں(سوالات کرنے)اس لیے انجوائے کیجیے”قوم”(آپ کو ایک ہی بار پہچان لینے کی صلاحیت سے عاری قوم) آپ کے ساتھ ہے۔

سیاسی قیادت آپ کے شانہ بشانہ ہے ساری اینٹی امریکا قوتیں ذراسے”اختلافی نوٹ“ کے ساتھ آپ کی دست و بازو ہیں آئیے یہ ایک بار پھر آپ کے” ٹشو پیپر“ بننے کے لیے اور دیدہ دل فرش راہ کیے ہوئے ہیں؟ ہمیں بھی بتائیے ،ہمارے لائق کوئی خدمت ؟کوئی حکم؟ ۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں