کہتے ہیں کہ جسمانی غلامی سے بد تر ذہنی غلامی ہوا کرتی ہے۔ کیوں کہ اس میں انسان آزاد ہونے کے باوجود اپنی مرضی سے نہ تو سوچ سکتا ہے اور نہ کچھ کرنے کی صلاحیت رکھتا ہے۔

انگریزوں نے جب برصغیر پر قبضہ کیا تو مسلمان ،اس وقت غلام نہیں ہوئے جب ان کے حکمرانوں کو انگریزوں نے پابند سلاسل کیا، بلکہ مسلمانوں کی اصل غلامی کا آغاز ان کے تعلیمی نظام کی تبدیلی سے ہوا ۔
انگریزوں نے مسلمانوں کو غلام بنانے کے لیے ہنگامی بنیادوں پر پرمسلمانوں کا صدیوں سے چلتا ہوا تعلیمی نظام بدل ڈالا۔ جس کے بعد راتوں رات عربی اور فارسی جاننے والا جاہل قرار دے دیا گیا اور انگریزی بولنے ولا عالم ۔ اور مسلم معاشرے کو ہر طرح کی ترقی سے پیچھے دھکیلنے کے لئے نوکریوں کے لیے انگریزی کو لازم کردیا گیا ۔ اور اس سازش میں وہ کامیاب بھی ہوئے۔ دیکھتے ہی دیکھتے تمام سرکاری ملازمتوں پر انگریز اور ہندو قابض ہوتے چلے گئے۔
سرسیید احمد خان نے وقت کی ضرورت کو محسوس کرتے ہوئے انگریزی کی تعلیم پر زور دیا اور مسلمانوں کے لئے اس کا انتظام کیا ۔لیکن اس کے ساتھ چونکہ مسلمانوں کو اپنے ثقافتی ورثے سے منسلک رکھنے کے اقدامات مؤثر نہیں کئے گئے تھے اس لئے آہستہ آہستہ مسلمان اپنی تہذیب کو بھولتے گئے اور مغربی تہذیب اور انگریزوں کا طور طریقہ اپنانے میں فخر محسوس کرنے لگے ۔ یہاں سے صحیح معنوں میں مسلمانوں کی سوچ غلام ہونا شروع ہوئی۔
جب پاکستان معرض وجود میں آیا تو ہم جسمانی طور پر تو آذاد ہوگئے لیکن ذہنی غلامی کا دور ختم نہ ہو سکا۔ ہونا یہ چاہیے تھا کہ جس طرح ہنگامی بنیادوں پر انگریزوں نے ہمارا تعلیمی نظام بدلہ تھا اسی طرح ہنگامی بنیادوں پر ہم کوبھی واپس اپنے تعلیمی نظام اور اپنی تہذیب کی طرف لوٹ آنا چاہیے تھا ۔ لیکن ایسا نا ہوا۔۔ ہم ہر آنے والے دن کے ساتھ ذہنی غلامی میں اس قدر پختہ تر اور اتنے خوگر ہوتے چلے گئے کہ آزادی کے لئے جدوجہد تک ترک کر دی۔
سب سوچ رہے ہونگے کہ کہ انگریزی بولنے اور مغربی لباس پہن لینے میں کیا قباحت ہے۔ بات درست ہے اس میں کوئی قباحت نہ سہی لیکن اصل مسئلہ انگریزی بولنے یا مغربی لباس پہنے کا نہیں بلکہ مسئلہ اس سوچ کا ہے جس کے تحت انگریزی بولنے والا عالم اور اردو بولنے ولا جاہل تصور یا جاتا ہو۔ انسان کو اس کی قابلیت سے پرکھنے کے بجائے اس کی زبان سے پرکھا جائے، اورقابل لوگوں کو معاشرے میں اچھا مقام اس لیے نا ملے کہ وہ انگریزی نہیں جانتے ۔
اس کو غلامانہ سوچ کہتے ہیں ۔
مغربی لباس پہننے میں کوئی برایی نہیں لیکن پینٹ شرٹ پہنے ہویے شخص کو مہذب اور شلوار قمیص میں ملبوس انسان کو پینڈو سمجھنا غلامانہ سوچ ہے ۔
کانٹے چھڑی سے کھانا کھانے والے کو مہذب اور ہاتھ سے کھانے والے کو غیر مہذب سمجھا جائے
یہ سوچ غلامانہ سوچ ہے ۔

جہاں تک نصاب تعلیم میں عربی اور فارسی کا تعلق ہے تو یہ اس لیے بھی ضروری پے کہ ہمارے اکابرین کی کتب انہی زبانوں میں ہیں۔ اگرچہ کچھ مواد کا ترجمہ ہو چکا ہے لیکن ایک بڑا ذخیرہ تا حال انہی دو زبانوں میں ہے۔ اگر ہم اپنے اسلاف کے بارے میں جاننا چاہیں تو ہمیں ان زبانوں کا آنا بہت ضروری ہے۔

اس میں کوئی شک نہیں کہ وطن عزیز پاکستان باقی غلام ممالک سے قدرے بہتر ہے
آج پاکستانی انگریزی آنے کے باوجود اردو بولنا پسند کرتے ہیں ، شلوار قمیض پہن کر فخر کرتے ہیں ۔اور اپنے تشخص کی حفاظت کی کوشش کرتے ہیں ۔
لیکن ہم مکمل آذاد اس وقت ہونگے جب ہمارا تعلیمی نظام ہمیں ایک بار پھر ہماری روایات اور ہماری تہذیب کی طرف لانے والا ہو گا ۔

__________________
اے اللہ
میرے ہر فیصلے میں تیری رضا ہو شامل
جو تیرا حکم ہو وہ میرا ارادہ کردے