آج جب سکول سے گھر واپس آئی تو دادا ابوکے بڑے بھائی کو گھر میں دیکھ کر بہت خوشی محسوس ہوئی۔ بہن بھائی بھی بہت خوش ہوئے کیونکہ وہ ہمیں مزے مزے کی کہانیاں سناتے ہیں۔ رات کوہم سب بہن بھائی بڑے دادا ابو کے پاس کہانی سننے کے لئے چلے گئے ۔ دادا ابو مسکرا تے ہوئے بولے بچو! بتائو آج کونسی کہانی سننی ہے؟ میں جلدی سے بولی دادا جان آج ہمیں پاکستان کی کہانی سنائیں' یعنی یہ بتائیں کہ پاکستان کیسے بنا؟ اس کے لئے ہمارے بزرگوں نے کیا کیا قربانیاں دیں؟

دادا جان ٹھنڈی آہ بھرتے ہوئے ''بیٹی کیا بتائوں'' یہ بڑی غمگین داستان ہے۔ جب ہمارے رہنمائوں نے پاکستان کا مطالبہ کیا تو ہندوستان میں ہر طرف ہنگامے شروع ہو گئے۔ ہندوئوں نے مسلمانوں پر ظلم وستم ڈھانے شروع کر دیے۔ ان دنوں میرے عمر تقریباً پندرہ برس تھی۔ ہم جس محلے میں رہتے تھے وہاں تقریباً تمام گھر مسلمانوںکے تھے۔ ہر رات محلے کے نواجوان محلے کا پہرہ دیتے کیونکہ ہندوئوں کے حملوں کا خدشہ رہتا تھا۔

ایک رات ہندوئوں نے ہمارے محلے میں حملہ کر دیا ہمارے محلے کے نوجوانوں نے انکا ڈٹ کر مقابلہ کیا' لیکن ہندو تعداد میں زیادہ تھے اور ان کے پاس اسلحہ بھی تھا۔ ہمارے آٹھ نوجوان شہید ہو گئے ۔ ہندوئوں نے کچھ گھروں کو آگ لگا دی۔ اس رات قیامت کا سماں تھا۔ ہر طرف چیخ وپکار تھی آگ سے بچنے کے لئے لوگ باہر بھاگ رہے تھے کچھ بچے آگ میں جل گئے کچھ ہندوئوں کے ہاتھوں مارے گئے۔

آخر کار ہمارے جوانوں نے ہندوئوں کو بھاگنے پر مجبور کر دیا لیکن ہمارا بہت سا نقصان ہوا۔ لوگ اپنے پیاروں کی موت پر آنسو بہا رہے تھے ۔ مائیں اپنے جوان بیٹوں کی لاشوں پر دھاڑیں مارکر رو رہی تھیں۔ بہنیں اپنے بھائیوں کی لاشوں پر بین کر رہی تھی۔ ہر آنکھ اشکبار ہو رہی تھی۔ اس رات کے بعد ہمارے بڑوں نے فیصلہ کیا کہ ہم کسی محفوظ علاقے کی طرف ہجرت کر جائیں ۔

14اگست1947ء کو جب پاکستان بنا تو ہم نے بھی پاکستان جانے کا فیصلہ کیا ۔ 22 اگست کی صبح ہم ایک قافلے کی صورت میں روانہ ہوئے۔ دو تین دن سفر کرنے کے بعد ایک رات جب ہم آرام کر رہے تھے تو ہندوئوں کے ایک جھتے نے ہمارے قافلے پر حملہ کر دیا بہت سے مسلمانوں کو شہید کر دیا'بچوں اور لڑکیوں کو اٹھا کر لے گئے۔

سازوسامان لوٹ لیا۔ حتیٰ کہ مویشی بھی چھین لئے۔ کچھ لوگوں نے بھاگ کر جان بچائی۔ میرے والد محترم کے سر پر ڈنڈا لگنے سے گہری چوٹ آئی ۔ ہم نے وقتی طور پر ان کے سر پر کپڑا باندھ دیا۔ الغرض بے شمار تکلیفیںاور مصبیتیں جھلیتے ہوئے ہم پاکستان پہنچ گئے۔

پاک سر زمین پر قدم رکھتے ہی ہم سب سجدہ ریز ہو گئے۔ خوشی سے ہماری آنکھوں سے آنسو نکل آئے اور ہم نے اللہ کا شکر ادا کیا۔ کہ اس نے خیروعافیت سے ہمیں پاکستان پہنچا دیا ۔ یہ کہہ کر دادا جان بولے چلو بچو! اب مجھے نیند آرہی ہے۔ باقی کی باتیں پھر کبھی سنائو گا۔

ہم دادا جان کا شکریہ ادا کرتے ہوئے اپنے اپنے بستروں پر سونے کے لئے چلے گئے ۔ اس رات سوتے ہوئے میں نے اللہ سے دعا مانگی کہ اے اللہ ! ہمارے اس وطن کو ہمیشہ ہمیشہ قائم ودائم رکھنا اور دل میں عہد کیا کہ میں دن رات محنت کر کے زیادہ سے زیادہ علم حاصل کروں گی۔ اورا پنے و طن کی ترقی کے لئے کوئی اہم کام کروں گی۔

''ہم پر ہمارے شہیدوں کے لہو کا قرض ہے جو ہم اپنے وطن کا نام روشن کر کے اتار سکتے ہیں'' آئیے ہم سب عہد کریں کہ ہم اپنے وطن کا نام روشن کریں گے اور ضرورت پڑنے پر اس کی خاطر اپنی جان بھی قربان کرنے سے دریغ نہیں کریں گے۔ ''پاکستان زندہ باد

__________________