لے کے رہیں گے پاکستان، بن کے رہے گا پاکستان،


یہ وہ آواز تھی جو بندوق کی نالوں، توپ کے دھانوں، تلوار کی دھار، نیزوں کی نوکوں سےبھی نا رکتی تھی۔ ایک جذبہ تھا آزادی کا مر مٹنے کا قربان ہونے کا، کچھ بھی نظر نہیں آتا تھا، بس ایک ہی دھن تھی جو سب کے سروں پہ سوار تھی، یہ کیسے لوگ تھے جو موت سے نہیں ڈرتے تھے یہ کون تھے جن کے لئے زندگی بے معنی تھی، جو قربان ہو جانا ایک اعزاز سمجھتے تھے، جن کے لئے گولیوں کی بوچھاڑ محض ایک برسات تھی جس میں ہر کوئی نہانے کے لئے بے تاب ایک دوسرے پر سبقت لے جانا چاہتا تھا، اور ایک ہی نعرہ بلند ہو رہا تھا،

لے کے رہیں گے پاکستان، بن کے رہے گا پاکستان،


اور پھر قدرت نے منظوری دےدی، لہو رنگ لایا، ایک سرخ بیج نے ایک گلاب کو جنم دیا، ہر طرف خوشیاں تھیں، یوں لگا سارے زخم بھر گئے۔

لیکن یہ کیا، یہ جذبے یہ جوش آہستہ آہستہ دفن ہوتا جا رہا ہے، یہ کیا ہو رہا ہے ہم کس سے خوفزدہ ہیں،
میں اپنا گھر چھوڑ کر صرف اسلام آباد سے لاہور جاتا ہوں تو خوفزدہ ہو جاتا ہوں میں خود غیر محفوظ سمجھتا ہوں، مجھے اپنے گھر کی فکر پریشان کرتی رہیتی ہے۔
میرا بچہ گھر سے سکول جاتا ہے تو دل کو پریشانی ہونے لگتی ہے کہ خیریت سے واپس آجائے۔
میرا بھائی دفتر سے لیٹ ہو جاتا ہے تو سارا گھر پریشان ہو جاتا ہے کہ رب خیر کرے وہ محفوظ ہو۔

یہ ایک عام آدمی کی سوچ ہے احساسات ہیں، ہم نے اپنے دفاع کو مظبوط بنایا، لیکن اسکا حال ویسا ہی ہے جیسا کہ ایک کینسر زدہ انسان جسکو کہ اپنے پیروں پہ کھڑا رہنا محال ہو، اسے زرہ بکتر پہنا دی جائے اور سمجھا جائے کہ جسم محفوظ ہے۔

آج ہم ایٹمی پاور ہیں، اور وہ قوت جو ہم نے اپنی حفاظت کے لئے حاصل کی ہے آج اسی قوت کو بچانا ہمارے لئے درد سر ہے۔ یہ کیسی قوت ہے جس نے ہمیں اور غیر محفوظ کر دیا ہے۔
ہمارے جذبوں کو زنگ کیوں لگتا جارہا ہے، ہمیں خوف نے گھیر لیا ہے ہمیں جانے انجانے وسوسوں نے اندیشوں نے ہمیں نگل لیا ہے، کیوں ہمارے ذہنوں میں یہ زہر بھر گیا ہے کہ پاکستان میں اب کچھ نہیں ہے کیوں،

اس سال 14 اگست 2009 پر میرا سب سے سوال ہے کہ ایسا کیوں ہے

اور ایسا کب تک رہے گا۔ کیا کبھی میرے گلشن میں وہ بہار نا آئے گی جو امر ہو گی۔

آئیں ایک اور کوشش کرئیں، اپنے روٹھے ہوئے رب سے اپنے گزرے ہوے ہر پل کی ہر گستاخی کی ہر گناہ کی ہر نافرمانی کی معافی مانگیں۔

آئیں ایک عہد کو اپنے دلوں میں جگائیں، اپنے بچوں کو اور آنے والی نسلوں کو وہ وقت یاد کرادیں،جب سب کی زباں پر ایک ہی نعرہ تھا۔

لے کے رہیں گے پاکستان، بن کے رہے گا پاکستان۔