کل کا پاکستان
1920 کی دہائی میں جس خطے کا خواب ایک شخس نے دیکھا اور 1940 کی دہائی میں اس خواب کو ایک اور شخس نے شرمندہ تعبیر کرنے کا بیڑہ اٹھایا ۔ ۔ ۔ بالآخر وہ عظیم سلطنت اسلامیہ لاکھوں افراد کی جانوں کا نزرانہ لیتے ہوئے اور دشمنوں کے تمام تر مذموم عزائم کو خاک میں ملاتے ہوئے 14 اگست 1947 کو معرض وجود میں آ گئی۔
تاہم پھر بھی اس ارض پاک کے دشمنوں کو یقین تھا کہ یہ نوزائدہ مملکت چند دن بھی نہ سہار سکے گی اور انکی سازشوں کی بدولت یہ خطہ پاک صفحہ ہستی سے نابود ہو جائے گا۔ مگر وہ شمع کیا بجھے جسے روشن خدا کرے۔
وہ مملکت جس کو تباہ کرنے کے سازشوں کے تانے بانے اس کی تخلیق سے قبل ہی رکھ دیئے گئے تھے۔ وہ مملکت کہ جسکو ایک طرف اس کی شہ رگ کشمیر سے محروم کر دیا گیا تو دوسری طرف گورداس پور،جونا گڑہ اور ریاست حیدرآباد پر قبضہ کر کے اس کی بنیادیں کمزور کرنے کا سبب فراہم کیا گیا۔ اس خطہ سرزمین کو تباہ کرنے کے لیے کہیں اسلام کو بطور ہتھیار استعمال کیا گیا تو کہیں بلوچستان میں پیسہ پانی کی طرح بہا کر اس کے لازمی حصوں کو اس میں شامل ہونے سے روکنے کی کوشش کی گئ۔ کبھی اس ملک کا پانی بند کر دیا گیا تو کبھی مال و دولت میں سے اس کا حصہ روک لیا گیا۔ ان تمام سازشوں کے بعد دشمنان دین و وطن کو یقین تھا کہ پاکستان عنقریب گھٹنوں کے بل گر کر ان سے معافی مانگتا ہوا آئے گا نہیں تو خود اپنے آپ میں ہی ٹوٹ کر بکھر جائے گا۔

مگر وہی مملکت کہ جس کے پاس اپنے کارندوں کو تنخواہ ادا کرنے کے پیسے نہ تھے۔وہی مملکت جس پر ایک کروڑمہاجرین کی دیکھ بھال کا بوجھ آ پڑا تھا جبکہ خود اس میں فاقوں کی نوبت تھی۔ وہی مملکت جس کے پاس محض چند فیکٹریاں معیشت کے نام پر، محض چند جنگی جہازملکی دفاع کے نام پر موجود تھے اس مملکت نے دشمنوں کے تمام منصوبوں اور بری خؤاہشوں کو ناکام بناتے ہوئے خود کو ان چند ممالک میں شامل کر لیا جو صفر سے آغاز کر کے خود کو بام عروج تک لے جاتے ہیں۔ دنیا کی تاریخ میں ایسے ممالک چند ہی ہوں گے کہ جنہوں نے باوجود بیرونی سازشوں اور اندرونی خلفشار کے بغیر کسی بیرونی مدد کے اس قدر حیران کن ترقی کی کہ دنیا کا واحد اسلامی ایٹم بم رکھنے والا ملک بن گیا۔

آج کا پاکستان
مکار ہمسائیوں کو اس ملک کا سکون ایک آنکھ نہ بھایا اور بڑی طاقتوں کے ساتھ مل کر سازشوں کے ایسے جال بچھا دیئے گئے کہ ہمارا ملک پاکستان اس میں بے بس پرندے کی طرح پھڑپھڑا کر رہ گیا۔
گزشتہ چند سال کے دوران نام نہاد دہشت گردی کے خلاف جنگ میں پاکستان کی معیشت کے ساتھ ساتھ امن و عامہ کا بھی دیوالیہ نکل کر رہ گیا۔

پاکستان کے مستقبل کے بارے میں آج ہر ہوشمند پاکستانی فکر مند ہے۔ خارجی خطرات سے کہیں زیادہ سنگین تر اندرونی روگ ہیں جو جسد وطن کو دیمک کی طرح چاٹ رہے ہیں۔فاٹا میں جاری اسلامی عسکریت پسندی،بلوچستان میں جاری بغاوت، سندھ میں بدتر امن و عامہ کی صورت حال، اور پنجاب میں بڑھتے ہوئے عسکریت پسندی کے سائے، دگرگوں معاشی صورت حال ۔ ۔ ۔ ان سب نے باسیان وطن کے چہروں سے حقیقی مسکراہت چھین لی ہے۔ اور حالات کی بد نصیبی یہ ہے کہ ہمارے مذہبی رہنما اپنے بدشگون بیانات سے ملک میں پھیلی مایوسی کی گھمبیرتا کو اور زیادہ بڑھاوا دے رہے ہیں۔ ہمارے سیاسی رہنما اپنے عقل سے کام لینے کے بجائے واشنگٹن میں بیٹھے آقاوں کے اشاروں پر زیادہ یقین رکھتے ہیں۔

لیکن اللہ کی رحمت پر بھروسہ رکھنے والے کہ جنہوں نے ابھی تک امید کا دامن اپنے ہاتھ سے نہیں چھوڑا وہ اس بات پر یقین رکھتے ہیں کہ کبھی نہ کبھی اس ملک میں ایک شخص ایسا آئے گا جو ان تمام مصیبتوں کی گھٹا ٹوپ اندھیروں کو دور کرے گا اور مملکت اسلامیہ پاکستان کو اس کے قیام کے حقیقی مقصد سے آشنا کرے گا۔

پاکستان کو لاحق امراض ہی درحقیقت اس کے لیے نوید شفا ہیں۔ کبھی کبھی مرض وجہ رحمت بھی بن جاتا ہے۔ عجیب بات یہ ہے کہ کئی امراض میں کسی مرض کو روکنے کے لیے مرض کو پیدا کرنے سے بہتر کوئی طریقہ علاج دریافت نہیں ہوا۔اور وہ مرض جب جسم میں سے آ کر گزر جاتا ہے تواس جسم کے لیے رحمت بن جاتا ہے کیونکہ اس سے جسم کی مخفی قوتیں جو مرض کو روکنے کے لیے فطرت نے اس کے اندر رکھی ہوتی ہیں وہ بروئے کار آ جاتی ہیں اورائیندہ کے لیے اسکی صحت کا ضامن بن جاتی ہین۔

پاکستان کا کل
پاکستان کا مستقبل کیوں روشن ہے۔ مجھے ایسے کونسے اشارے ملے ہیں جنکی بنیاد پر میں اتنا پر امید ہوں ۔ ۔ ۔ میں انکا تزکرہ مختصرا۔ ۔ ۔ بیان کر دیتا ہوں۔

بنیادی نظریہ کا احیا
پاکستان اسلام کے نام پر حاصل کیا گیا۔اور یہ اسلام ہی ہے جس نے چاروں صوبوں کو ایک لڑی میں پرو رکھا ہے۔ بد قسمتی سے شروع کے ادوار میں پاکستانی عوام مناظروں اور علما کی لڑائیوں کو اسلام کا اصل سمجھ بیٹھی تھی۔جسکا نتیجہ ملک میں فرقی واریت کی وجہ سے ہزاروں معصوم جانوں کا اتلاف تھا۔ تاہم اب عوام میں اسلام کے درست مفہوم کا شعور بیدا ہو رہا ہے جسکی وجہ سے پاکستان میں فرقہ واریت کا جن کافی حد تک قابو میں آ چکا ہے۔ اس کے ساتھ ساتھ عوام میں اسلام اس بات کا احساس بھی پیدا ہو رہا ہے کہ اسالم ہی ان کے تمام مسائل کا حل ہے۔

جدید ٹیکنالوجی اور سائنس کی ترقی اور ملکی محبت میں اضافہ:
پاکستان کے نوجوان سائنس اور ٹیکنالوجی کے میدان میں اپنا لوہا منوا رہے ہیں۔ ہمارے نوجوان پوری دنیا سے مقابلہ کر کے اپنے وطن کے لیے انعامات جیت کر لا رہے ہیں۔لیکن ساتھ ہی ساتھ ان نوجوانوں میں وطن کے ساتھ محبت کا جذبہ بھی بلند ہے۔ یہ نوجوان اپنے دوست اور دشمن کی ٹھیک پہچان رکھتے ہیں اور اس کا برملا اظہار بھی کرتے ہیں جیسا ایک پاکستانی نوجوان خرم نے امریکن سفیر کے ساتھ کیا۔

معاشرتی ترقی:
کاروکاری،ونی،قران سے شادی جیسے مذموم افعال کو سر انجام دینے والی قوم آج اس افعال کا قلعہ قمعہ کرنے کو سربستہ ہے۔یہ پاکستانی معاشرے میں پیدا ہوتی جدیداور حقیقی اسلام پسندی کا احیا اور معاشرتی ترقی کا آئینہ دار ہے۔ اگر اس سمت میں کام جاری رہا تو پاکستانی معاشرے میں پلنے والے مزموم رسومات کا خاتمہ ہو جائے گا اور اس طرح پاکستان حقیقی اسلامی معاشرہ بننے کے قریب ہو جائے گا۔

کرپشن میں کمی اور ملکی مفادات کو اولیت:
جدید ٹیکنالوجی کی فراوانی اور حکومتوں کے اقدامات اور عوام میں شعور آنے کی وجہ سے پاکستان میں کرپشن میں خاطر خواہ کمی دیکھنے میں آ رہی ہے۔سرکاری اطوار میں تبدیلی آ رہی ہے۔ اور سرکاری اہلکار اب خود کو عوام کا بادشاہ سمجھنے کے بجائے عوام کا خادم سمجھنے کی طرف مائل ہو رہے ہیں۔جو کام سالوں میں ہوا کرتے تھے اب دنوں میں ہوا کرتے ہیں۔ میڈیا اور عدالتوں کی وجہ سے حکمران پہلے کی طرح اپنے من مانے فیصلے نہیں کر پا رہے اور انکو ملکی مفادات کو بھی اہمیت دینا پڑتی ہے

انفرا سٹرکچر کی ترقی:
پاکستان میں سڑکوں اور ٹیلی کمیونیکیشن کی طرف کم توجہ دی جاتی تھی۔ تاہم پچھلے کچھ سالوں میں پاکستان نے اس شعبہ میں بہت ترقی کی ہے۔ جس کی وجہ سے نہ صرف عوام کو سہولت ہوئے ہے بلکہ موبائل ٹیکنالوجی کی فراوانی کی وجہ سے نہ صرف فاصلے کم ہو گئے ہیں بلکہ عوام میں انفارمیشن کو پھیلانے میں بھی مدد کی ہے۔

ًمیڈیا:
جہاں کبھی پاکستان میں صرف ایک سرکاری ٹی وی چینل ہوا کرتا تھا جو بھارتی پروپیگنڈا کا موثر جواب دینے میں کلی طور پر ناکام تھا اب اس ملک میں درجنوں کی تعداد میں نیوز چینلز ہیں جو نہ صرف بھارتی پروپیگنڈہ کا منہ توڑ جواب دے رہے ہیں بلکہ پاکستانی عوام میں تعلیم،قانون اور انکے حقوق کے حوالے سے شعور بیدا کرنے میں اپنا کردار بھی ادا کر رہے ہیں۔

ملکی دفاع:
دیگر اسلامی ممالک کے برعکس پاکستان نے اپنے دفاع پر خصوصی توجہ دی ہے اور آج بھی اپنی اس کمٹمنٹ پر قائم ہے۔ اج پاکستان دنیا کا واحد اسلامی ملک ہے جس کے پاس ایٹم بم ہے بلکہ پاکستان کے پاس اپنی ڈویلپ کردہ جدید ترین میزائل ٹیکنالوجی بھی ہے۔ پاکستان اپنے دفاع کے لیے ہر مملکن اقدام کر رہا ہے جسکی وجہ سے طاقتور سے طاقتور ملک بھی پاکستان کی طرف میلی آنکھ دیکھنے سے گھبراتا ہے۔

قومی یکجہتی:
پہلے معلومات کی عدم دستیابی کی وجہ سے عوام ایک دوسرے سے کٹے ہوئے تھے اور انکو معلوم نہ ہوتا تھا کہ کیا ہو رہا ہے۔اسی وجہ سے 1971 میں سانحہ مشرقی پاکستان بھی وقع پذیر ہوا۔ تاہم آج میڈیا اورموبائل ٹیکنالوجی کی بدولت پورا پاکستان ہماری جیب میں سمٹ آیا ہے۔ آج ایک عام پاکستانی ماضی کی نسبت زیادہ با خبر ہے۔اسی وجہ سے 2005 کا کشمیر کا زلزلہ ہو یا پھر 2008 کا بلوچستان کا زلزلہ، عدلیہ پر شب خون کا معاملہ ہو یا پھر بلوچستان کے حقوق کا معاملہ ۔ ۔ ۔ سبھی پاکستانی یک جان ہو جاتے ہیں۔ جس کی وجہ سے پاکستان کے ایک مضبوط قوم ہونے کا تاثر ابھرتا ہے۔

انصاف کی فراہمی:
کوئی ملک بھی انصاف کے بغیر قائم نہیں رہ سکتا۔ پاکستان میں بد قسمتی سے عدلیہ حکمرانوں کی کٹھ پتلی رہی ہے۔ تاخیر سے فیصلے، رشوت ستانی وغیرہ جیسے ناسور لوگوں کو انصاف سے دور رکھ رہے تھے جس کی وجہ سے عوام میں بے چینی پیدا ہو جاتی تھی۔ تاہم عدلیہ بحالی کے بعد سے اس سلسلہ میں بہت سے اقدامات کیے گئے ہیں تاکہ مظلوم عوام کو جلد سے جلد انصاف مل سکے۔ عدلیہ اب حکمرانوں کا احتساب کرنے لگ پڑی ہے۔ اگر یہی صورت حال جاری رہی تو امید ہے کہ اس ملک کو عنقریب حقیقی مخلص لیڈرشپ مل جائے گی جو اس ملک کو اس کے قیام کا مقصد حاصل کرنے میں مدد دے گی۔

یہ اور ان جیسے لا تعداد اشارے ایسے میں ۔ ۔ ۔ جن کو جب میں دیکھتا ہوں تو مجھے یقین ہو جاتا ہے کہ وہ وقت دور نہیں جب پاکستان حقیقی اسلامی فلاحی سلطنت بن کر اس ارض مقدس پر ابھرے گا اور مسلمانا پاکستان کو انکی خوشیاں واپس مل کر رہیں گی۔انشاللہ

:::::::::::::::::::::::: 14 اگست کے حوالے سے پیش کیا گیا :::::::::::::::::::::::