دوستوں‌السلام علیکم،
چودہ اگست کی آمد آمد ہے جگہ جگہ پاکستانی پرچم لہراتے ہوئے نظر آ رہے ہیں۔ اس مرتبہ پچھلے سالوں‌کی بہ نسب گہما گہمی کچھ کم ہے شاید اس کا سبب سیلاب اور ملکی میں‌دہشت گردی کی تازہ لہر بھی ہو سکتی ہے۔
اللہ ہم پر اپنا رحم و کرم نازل فرمائے آمین ثم آمین ۔ ۔ ۔ ۔

آج آپ سے اپنا ایک واقعہ شئیر کرنا چاہتا ہوں۔

میری بڑی بیٹی فارہہ ابھی چھوٹی ہی تھی اور بولنا سیکھ رہی تھی۔ اگست کا مہینہ تھا ٹی وی اور ریڈیو سے قومی ترانے آ رہے تھے۔ اکثر اوقات ٹی وی پر "پاکستان کا مطلب کیا لا الہ الا اللہ" کا نعرہ سُننے کو مل جاتا تھا۔ فارہہ اس نعرے کو بہت غور سے سُنتی، اُس کے ننھے ذہن میں‌ اس نعرے سے مُراد "سبز ہلالی پرچم" بنتا تھا۔ ہم گھر والے اس بات سے بے خبر تھے۔

ایک دن فارہہ نے مجھ سے جھنڈا خریدنے کی ضد کی اور کہا "بابا مجھے پاکستان کا مطلب" چاہیئے۔ میں‌اُس کی معصومانہ بات سُن کر ہنس پڑا اور ‌اُسے گود میں‌لے کر جھنڈا خریدنےنکلا۔

ہمارے پڑوسیوں نے ایک جھنڈا اپنی چھت پر لگایا ہوا تھا، فارہہ نے جونہی اُسے دیکھا تو خوشی سے چلا کرکہا "بابا پاکستان کا مطلب" (یعنی پاکستان کا پرچم)۔ میں‌ہنس کر کہا جی بیٹا!

تھوڑی ہی دور پر اُسے ایک اور جھنڈا نظر آیا۔ پہلے تو فارہہ نے پیچھے گھوم کر دیکھا اور پھر سامنے اور پھر میری تھوڑی پکڑ کر بولی "بابا پاکستان کے دو دو مطلب!"

آج کئی سالوں‌کے بعد یہ بات یاد آ رہی ہے تو ہنسے کے بجائے رونے کو دل چاہ رہا ہے، جس ملک کا مطلب "کلمہ طیبہ" سمجھا جاتا ہے اُسی ملک کو کلمہ گو تباہ کردینے کے درپے ہیں۔

نت نئے "فتاویٰ ہاؤسز" کھل گئے ہیں‌، "تو کافر، وہ گمراہ، میں‌مسلمان" والے روئیے نے ہمیں‌کہیں‌کا نہیں چھوڑا۔ دوسری جانب صوبائی اور لسانی عصبیت کا بازار گرم ہے۔ "چھُری خربوزے پر گرے یا خربوزہ چھُری پر دونوں‌صورتوں‌میں‌نقصان خربوزے کا ہی ہوتا ہے" ناجانے ان لوگوں‌نے یہ کہاوت سُنی بھی ہے یا نہیں!!!!

بغداد کی تباہی کا الزام تو ہلاکو کے سر جاتا ہے لیکن اس مملکت خداداد کی جڑیں‌تو خود ہم ہی کھوکھلی کر رہے ہیں۔ "شبِ قدر میں‌وجود پذیر ہونے والا یہ ملک باقی رہنے کے لیئے بنا ہے" اپنے کان میں‌ہونے والی یہ شرگوشی مجھے اب تک یاد ہے اور میں‌اب تک اس بات کی صداقت پر قائم ہوں‌۔

مجھے ذہنی اذیت ہوتی ہے جب میری بیٹاں مجھے یہ بتاتیں ہیں‌کہ "بابا آج فلاں‌جگہ بم دھماکے میں‌اتنے لوگ مارے گئے" وہ شاید یہ سمجھتیں‌ہیں کہ شاید یہ سب کچھ اسی طرح‌سے ہوتا آیا ہے۔
مجھے یاد ہے کہ میرے بچپن میں ایک بدمعاش نے ‌کسی شخص کو چاقو سے زخمی کردیا تھا، اس واقعے کے بعد ہمارے اسکول کی چھٹی ہوگئی تھی اور اسکول ایک دن بند رہا تھا۔ ہم لوگ گھروں‌میں‌سہمے دُبکے بیٹھے تھے۔
آج روز ہی کوئی نا کوئی اپنی جان سے ہاتھ دھو بیٹھتا ہے اور ہم بے حسی سے اپنے اپنے کاموں‌میں‌مشغول ہیں
ع
حادثے سے بڑا حادثہ ہوگیا
کوئی رُکا نہیں‌حادثہ دیکھ کر

بس بہت ہوچکا میرے کان پک چُکے ہیں‌بے گناہوں‌کی اموات کی خبریں‌سُن سُن کر:
ع
قتل ہوا ہو کوئی، میں‌دار پر چڑھا ہوں
ہر روز مر جانے سے میں‌تنگ آ گیا ہوں

اے ہمارے رب؛
ہم پر اپنا فضل نازل فرما، آمین ثم آمین ۔ ۔ ۔ ۔
ہماری جان، مال عزت آبرو کی حفاظت فرما، آمین ثم آمین ۔ ۔ ۔ ۔
ہمارے ملک کی اندرونی اور بیرونی دشمنوں سے حفاظت فرما، آمین ثم آمین ۔ ۔ ۔ ۔
ہمارے گناہوں‌اور خطاؤں کو معاف کردے، آمین ثم آمین ۔ ۔ ۔ ۔
ہمیں‌ہر وہ خیر عطا فرما دے جو نبی کریم صلی اللہ علیہ وسلم نے تجھ سے طلب کی، آمین ثم آمین ۔ ۔ ۔ ۔
ہمیں‌ہر وہ اُس شر سے محفوظ فرما دے جس سے نبی کریم صلی اللہ علیہ وسلم نے پناہ طلب کی، آمین ثم آمین ۔ ۔ ۔ ۔
ہمیں‌ایمان پر عافیت کے ساتھ خاتمہ نصیب فرما، آمین ثم آمین ۔ ۔ ۔ ۔
آمین ثم آمین ۔ ۔ ۔ ۔بجاہ النبین الامین یا رب العالمین